Namangan davlat texnika universitetida ilmiy-ijodiy salohiyatni qoʻllab-quvvatlash tizimi yangi bosqichga koʻtarilmoqda. Buni oliygoh olim va talabalarining ushbu yoʻnalishdagi saʼy -harakatlari, iqtidorli yoshlarni qoʻllab-quvvatlashning samarali tizimi yoʻlga qoʻyilganligida yaqqol koʻrish mumkin. Masalan, joriy yilda oʻtkazilgan “Menda gʻoya bor!” innovatsion gʻoyalar tanlovi katta qamrov va yuqori faolligi bilan ajralib turdi. Unda 9 ta fakultet va magistratura boʻlimidan 256 nafar talaba ishtirok etgani va 146 nafar iqtidor egasi gʻolib deb topilgani — universitetdagi ilmiy-innovatsion jarayonlarning jonlanayotganidan dalolat beradi. Gʻoliblarga umumiy qiymati 440 million soʻm miqdoridagi pul mukofotlarining topshirilishi esa yoshlar izlanish va intilishi hamda tashabbusini ragʻbatlantirish borasida muhim qadamlardan biri boʻldi.

“Yilning eng faol talabasi – 2025” tanlovida ham yuqori faollik qayd etildi. Universitet bosqichiga 42 nafar nomzod hujjat topshirgan edi, ular orasidan eng munosib 7 nafar talaba respublika bosqichiga tavsiya qilindi.

Oliygohda kuni kecha iqtidorli talabalarning ilmiy tadqiqot faoliyatini tashkil etish boʻlimi tomonidan tashkil etilgan tadbirda yangi oʻquv yilida yigit-qizlar yaratgan ilmiy-innovatsion ishlanmalar koʻrgazmasi namoyish qilindi. Unga qoʻyilgan loyihalar nafaqat universitet miqyosidagi, balki respublika va xalqaro darajadagi tanlovlarda ishtirok etib, munosib natijalarga erishgan ishlanmalardan iborat ekanligi ahamiyatli.

— Atrof-muhitni muhofaza qilish bugungi kunning eng dolzarb masalalaridan biri. Shaharlar rivojlanar ekan, toza ekologik muhitni saqlab qolish uchun yangi, tejamkor va samarali texnologiyalar zarur. Men yaratgan “Eco Clean Autonomous” nomli zamonaviy tozalash mashinasi shunday ehtiyojdan kelib chiqqan, — deydi 3-bosqich talabasi Abdulloh Isoqjonov. — Ushbu qurilma sunʼiy intellekt asosida ishlaydi, chiqindilarni aniqlab, ularni avtomatik yigʻadi hamda saralash funksiyasiga ega. Eng muhimi , energiya tejamkor va ekologik jihatdan xavfsiz. Universitet tomonidan gʻoyam qoʻllab-quvvatlanib, demo versiyasini yaratish uchun 3,5 million soʻm miqdorida mablagʻ ajratilgani menga katta kuch berdi. Bu, nafaqat tashabbusimni qadrlash, balki kelajakda loyiha sanoat miqyosiga chiqishi mumkinligidan dalolat.

Universitetda taqdim etilayotgan startaplar, muhandislik yechimlari, axborot texnologiyalari, sanoatga yoʻnaltirilgan modellar va raqamli texnologiyalarga doir ishlanmalar koʻplab mutaxassislar tomonidan yuksak baholanmoqda.. Bu jarayon universitetda shakllanayotgan ilmiy-innovatsion ekotizimning barqaror rivojlanayotganini, yoshlar oʻz ilmiy gʻoyalarini amaliy loyihalarga aylantira olayotganini tasdiqlaydi.

-Har bir iqtidorli yosh — bu millatning ilmiy qudrati. Universitetimizdagi koʻplab talabalarda shunday qudrat bor. Biz ularning salohiyatini yuzaga chiqarish uchun bilim, imkoniyat va ishonchni uygʻunlashtirishni bosh maqsad qilganmiz, – deydi OTM boʻlim boshligʻi Maʼmurjon Ergashev.

Mazkur oliygoh joriy yil boshida viloyatdagi uchta institutni birlashtirgan holda universitetga aylantirilganidan soʻng bu yerda faqatgina malakali mutaxassislar tayyorlabgina qolmasdan yoshlarning intellektual rivoji, ularning ilm-fanga boʻlgan qiziqishi va tashabbuskorligi uchun mustahkam zamin yaratish imkoniyatini ham yuzaga chiqarilgani eʼtiborga loyiq.

Qudratilla NAJMIDDINOV, “Xalq soʻzi”.