Наманган давлат техника университетида илмий-ижодий салоҳиятни қўллаб-қувватлаш тизими янги босқичга кўтарилмоқда. Буни олийгоҳ олим ва талабаларининг ушбу йўналишдаги саъй -ҳаракатлари, иқтидорли ёшларни қўллаб-қувватлашнинг самарали тизими йўлга қўйилганлигида яққол кўриш мумкин. Масалан, жорий йилда ўтказилган “Менда ғоя бор!” инновацион ғоялар танлови катта қамров ва юқори фаоллиги билан ажралиб турди. Унда 9 та факультет ва магистратура бўлимидан 256 нафар талаба иштирок этгани ва 146 нафар иқтидор эгаси ғолиб деб топилгани — университетдаги илмий-инновацион жараёнларнинг жонланаётганидан далолат беради. Ғолибларга умумий қиймати 440 миллион сўм миқдоридаги пул мукофотларининг топширилиши эса ёшлар изланиш ва интилиши ҳамда ташаббусини рағбатлантириш борасида муҳим қадамлардан бири бўлди.

“Йилнинг энг фаол талабаси – 2025” танловида ҳам юқори фаоллик қайд этилди. Университет босқичига 42 нафар номзод ҳужжат топширган эди, улар орасидан энг муносиб 7 нафар талаба республика босқичига тавсия қилинди.

Олийгоҳда куни кеча иқтидорли талабаларнинг илмий тадқиқот фаолиятини ташкил этиш бўлими томонидан ташкил этилган тадбирда янги ўқув йилида йигит-қизлар яратган илмий-инновацион ишланмалар кўргазмаси намойиш қилинди. Унга қўйилган лойиҳалар нафақат университет миқёсидаги, балки республика ва халқаро даражадаги танловларда иштирок этиб, муносиб натижаларга эришган ишланмалардан иборат эканлиги аҳамиятли.

— Атроф-муҳитни муҳофаза қилиш бугунги куннинг энг долзарб масалаларидан бири. Шаҳарлар ривожланар экан, тоза экологик муҳитни сақлаб қолиш учун янги, тежамкор ва самарали технологиялар зарур. Мен яратган “Eco Clean Autonomous” номли замонавий тозалаш машинаси шундай эҳтиёждан келиб чиққан, — дейди 3-босқич талабаси Абдуллоҳ Исоқжонов. — Ушбу қурилма сунъий интеллект асосида ишлайди, чиқиндиларни аниқлаб, уларни автоматик йиғади ҳамда саралаш функциясига эга. Энг муҳими , энергия тежамкор ва экологик жиҳатдан хавфсиз. Университет томонидан ғоям қўллаб-қувватланиб, демо версиясини яратиш учун 3,5 миллион сўм миқдорида маблағ ажратилгани менга катта куч берди. Бу, нафақат ташаббусимни қадрлаш, балки келажакда лойиҳа саноат миқёсига чиқиши мумкинлигидан далолат.

Университетда тақдим этилаётган стартаплар, муҳандислик ечимлари, ахборот технологиялари, саноатга йўналтирилган моделлар ва рақамли технологияларга доир ишланмалар кўплаб мутахассислар томонидан юксак баҳоланмоқда.. Бу жараён университетда шаклланаётган илмий-инновацион экотизимнинг барқарор ривожланаётганини, ёшлар ўз илмий ғояларини амалий лойиҳаларга айлантира олаётганини тасдиқлайди.

-Ҳар бир иқтидорли ёш — бу миллатнинг илмий қудрати. Университетимиздаги кўплаб талабаларда шундай қудрат бор. Биз уларнинг салоҳиятини юзага чиқариш учун билим, имконият ва ишончни уйғунлаштиришни бош мақсад қилганмиз, – дейди ОТМ бўлим бошлиғи Маъмуржон Эргашев.

Мазкур олийгоҳ жорий йил бошида вилоятдаги учта институтни бирлаштирган ҳолда университетга айлантирилганидан сўнг бу ерда фақатгина малакали мутахассислар тайёрлабгина қолмасдан ёшларнинг интеллектуал ривожи, уларнинг илм-фанга бўлган қизиқиши ва ташаббускорлиги учун мустаҳкам замин яратиш имкониятини ҳам юзага чиқарилгани эътиборга лойиқ.

Қудратилла НАЖМИДДИНОВ, “Халқ сўзи”.