Illyustrativ foto

Gvatemalada seshanba kuni sodir boʻlgan ketma-ket zilzilalar oqibatida kamida ikki kishi halok boʻlgan. Bu haqda mahalliy “Prensa Libre” nashri xabar bermoqda.

“Ikki kishi Eskuintla departamentining Palin shahridan Santa-Mariya-de-Jesus yoʻnalishidagi shossening 47-kilometrida halok boʻldi. Ular ketayotgan mashina ustiga katta tosh qulab tushgan”, — deyiladi xabarda. Qayd etilishicha, halok boʻlganlar bir oila vakillari boʻlib, ular 53 yoshli Teodoro Chil va 20 yoshli Frederik Childir.

Gvatemala seysmologiya xizmati maʼlumotlariga koʻra, 5,2 magnitudali birinchi yer silkinishi mahalliy vaqt bilan soat 15.11da Palin shahri yaqinida 5 kilometr chuqurlikda qayd etilgan. Shundan soʻng mamlakatning turli hududlarida 30 dan ortiq zilzila sodir boʻlgan. Ularning taʼsiri poytaxt mintaqalari — Eskuintla va Sakatepekesda ham sezildi.

Tabiiy ofatlarni boshqarish boʻyicha Milliy muvofiqlashtirish boshqarmasi mamlakatda “toʻq sariq” ogohlantirish darajasini eʼlon qildi. Uylarga zarar yetgani, koʻchkilar sodir boʻlgani va yoʻl harakati toʻxtab qolgani haqida xabarlar berildi. Tabiiy ofatlar yuz bergan hududlarda qidiruv-qutqaruv ishlari olib borilmoqda.