Иллюстратив фото

Гватемалада сешанба куни содир бўлган кетма-кет зилзилалар оқибатида камида икки киши ҳалок бўлган. Бу ҳақда маҳаллий «Prensa Libre» нашри хабар бермоқда.

«Икки киши Эскуинтла департаментининг Палин шаҳридан Санта-Мария-де-Жесус йўналишидаги шоссенинг 47-километрида ҳалок бўлди. Улар кетаётган машина устига катта тош қулаб тушган», — дейилади хабарда. Қайд этилишича, ҳалок бўлганлар бир оила вакиллари бўлиб, улар 53 ёшли Теодоро Чил ва 20 ёшли Фредерик Чилдир.

Гватемала сейсмология хизмати маълумотларига кўра, 5,2 магнитудали биринчи ер силкиниши маҳаллий вақт билан соат 15.11да Палин шаҳри яқинида 5 километр чуқурликда қайд этилган. Шундан сўнг мамлакатнинг турли ҳудудларида 30 дан ортиқ зилзила содир бўлган. Уларнинг таъсири пойтахт минтақалари — Эскуинтла ва Сакатепекесда ҳам сезилди.

Табиий офатларни бошқариш бўйича Миллий мувофиқлаштириш бошқармаси мамлакатда «тўқ сариқ» огоҳлантириш даражасини эълон қилди. Уйларга зарар етгани, кўчкилар содир бўлгани ва йўл ҳаракати тўхтаб қолгани ҳақида хабарлар берилди. Табиий офатлар юз берган ҳудудларда қидирув-қутқарув ишлари олиб борилмоқда.