Foto: Sirdaryo viloyat hokimligi

Oʻktamjonov Farrux Oʻktamjonovich nomzodi Guliston shahar hokimi lavozimiga tasdiqlandi. Bu haqda Sirdaryo viloyati hokimligi axborot xizmati xabar berdi.

Maʼlum qilinishicha, bugun, 25-noyabr kuni Guliston shahrida Xalq deputatlari shahar kengashining navbatdan tashqari sessiyasi oʻtkazilgan. Unda tashkiliy masala koʻrilgan:

Shu kunga qadar shahar hokimi lavozimida ishlab kelgan Xojimanov Jamoliddin Husniddinovich egallab turgan lavozimidan ozod etilgan. Shundan soʻng, deputatlar tomonidan bunga qadar Sirdaryo viloyati IIB boshligʻining birinchi oʻrinbosari lavozimida faoliyat olib borgan Oʻktamjonov Farrux Oʻktamjonovich nomzodi Guliston shahar hokimi lavozimiga tasdiqlangan.

Sessiya ishida viloyat hokimi vazifasini bajaruvchi Erkinjon Turdimov nutq soʻzlab, shaharda qator sohalarda qoloqlikka yoʻl qoʻyilayotganligi, xususan, kambagʻallikni qisqartirish, aholi bandligini taʼminlash, yangi investitsion loyihalarni ishlab chiqish va amalga oshirish, eksport borasida shahar birinchi rahbarining harakatlari yetarli emasligini qayd etgan.

Shuningdek, deputatlar ham shaharni yanada rivojlantirish borasida ishga solinmagan imkoniyatlar haqida oʻz fikrlarini bildirgan.