“Le Parisien” xabariga koʻra, Fransiyada Luvr muzeyidagi yirik oʻgʻrilikka aloqador ikki kishi hibsga olingan.

Ulardan biri Ruassi–Sharl-de-Goll aeroportida, Jazoirga uchish arafasida qoʻlga olingan. Ikkinchisi esa Parij sud politsiyasi tomonidan Sen-Sen-Deni tumanida hibsga olingan. Operatsiya Fransiya Ichki ishlar vazirligining banditizmga qarshi kurash boʻlimi tomonidan oʻtkazilgan.

Erkaklar “tashkillashtirilgan oʻgʻrilik” va “jinoyat sodir etish maqsadida til biriktirish” moddalari boʻyicha hibsga olingan. Ular ilgari ham oʻgʻrilik qilgani uchun politsiyaga tanish boʻlib, tergov doirasida 96 soatgacha qamoqda saqlanishi mumkin. Tergovchilar gumonlanuvchilarning jami toʻrt kishi boʻlganini taxmin qilmoqda.

Eslatib oʻtamiz, Luvr muzeyidagi oʻgʻrilik 19-oktyabr kuni sodir boʻlgan. Jinoyatchilar Apollon galereyasiga kirib, atigi bir necha daqiqa ichida toʻqqizta tarixiy qimmatbaho zargarlik buyumini oʻgʻirlab chiqib ketishgan.

Dastlabki baholashlarga koʻra, oʻgʻirlangan buyumlarning umumiy qiymati 88 million yevroni tashkil etadi.

Yoʻqolgan buyumlar orasida Mariya Luizaning (Napoleonning ikkinchi rafiqasi) marjon va sirgʻalari, qirolicha Mariya Amaliya hamda gollandiyalik qirolicha Gortenziya de Buarne kolleksiyalariga mansub uchta zargarlik buyumi, shuningdek, Yevgeniya kolleksiyasidan toʻrtta tarixiy ashyolar bor.