Namangan viloyatining Davlatobod tumanida aholiga koʻrsatilayotgan tibbiy xizmatlar sifatini yanada oshirish maqsadida navbatdagi muhim loyiha amalga oshirildi. “Gulshan” mahallasi hududida joylashgan 11-sonli oilaviy poliklinika endi yangi tiklangan zamonaviy binoda faoliyat koʻrsatadi. Mazkur inshoot 2 milliard 757 million soʻm mablagʻ evaziga qurilib, bu yerda shifokorlar uchun qulay ish sharoiti, bemorlarga keng va yorugʻ qabul xonalari barpo etilgan.Shuningdek, laboratoriya, diagnostika va profilaktika xizmatlari, fizioterapiya muolajalari uchun ajratilgan xonalarning jihozlari ham butunlay yangilandi.

- Muassasasimiz kuniga yuz nafar fuqaroni qabul qilish imkoniyatiga ega boʻldi, -deydi bosh shifokor Rahimjon Rahimov. — Ayni paytda “Gulshan” hududdagi toʻrtta mahallaning 21,7 mingdan ziyod aholisiga birlamchi tibbiy xizmat koʻrsatilmoqda.

Yangilangan poliklinika bugungi kunda raqamlashtirilgan holda faoliyat koʻrsatayotir. DMED tizimi ishga tushirilgani natijasida bemorlarga infokiosk orqali navbat cheki berish va ularni zarur mutaxassisga yuborish tartibi qoʻllanilayotgani barchaga yengillik yaratmoqda.

Qudratilla NAJMIDDINOV, “Xalq soʻzi”.