Bugun, 3-noyabr kuni Doxa shahrida 2025-yilgi FIFA U-17 Jahon chempionati start oladi.

Oʻzbekiston U-17 terma jamoasi oʻsmirlar oʻrtasidagi jahon chempionatlarida 4-bora ishtirok etmoqda. Jamoa 2011-yil (Meksika) va 2023-yilgi (Indoneziya) musobaqalarda chorak finalgacha yetgan. 2013-yilda Birlashgan Arab Amirliklarida oʻtgan mundialda esa 1/8 final bosqichida ishtirokini yakunlagan.

Islombek Ismoilov boshqaruvidagi jamoa 2025-yilgi FIFA U-17 Jahon chempionatining “J” guruhida Paragvay, Irlandiya va Panama oʻsmirlar terma jamoalariga qarshi bahs olib boradi.

Paragvay

Yoʻllanma: U-17 Janubiy Amerika chempionati — 5-oʻrin

Mundialdagi ishtiroklar: 5

Eng yaxshi natija: chorak final (1999, 2019)

Murabbiy: Mariano Uglesich

Eʼtiborga loyiq oʻyinchi: Alan Ledesma

Ledesma U-17 Jahon chempionati yoʻllanmasini qoʻlga kiritishda Paragvay jamoasining muhim oʻyinchisi boʻlgan. Jamoa sardori sifatida u maydon markazida oʻyinni boshqaradi va kurashuvdanligi bilan ajralib turadi. Shuningdek, u U-17 Janubiy Amerika chempionatida Paragvay ikki marta penalti seriyasida gʻalaba qozongan bahslarda zarbasini aniq amalga oshirib, jamoasi gʻalabasiga hissa qoʻshgan.

Panama

Yoʻllanma: KONKAKAF U-17 saralash bosqichi — guruh gʻolibi

Mundialdagi ishtiroklar: 3

Eng yaxshi natija: 1/8 final (2011)

Murabbiy: Leonardo Pipino

Eʼtiborga loyiq oʻyinchi: Estevis Lopes

Chap qanot hujumchisi — Lopes murabbiy Leonardo Pipino tizimida muhim oʻrin tutadi. U KONKAKAF U-17 saralash bosqichida Panamaning uchta golida qatnashgan, ijodkorligi hamda aniq va kuchli zarbalari bilan oʻyin taqdirini oʻz foydasiga oʻzgartira oladi. Hozirda u Panamaning “Costa del Este” klubidan Argentinadagi “River Pleyt” yoshlar jamoasiga ijara asosida oʻynamoqda.

Irlandiya

Yoʻllanma: UYEFA U-17 Yevropa chempionati final bosqichi qatnashchisi

Mundialdagi ishtiroklar: 0

Eng yaxshi natija: yoʻq

Murabbiy: Kolin OʼBrayn

Eʼtiborga loyiq oʻyinchi: Jeyden Umeh

Tezkor, ijodkor va gol urishga moyil hujumchi Umeh Portugaliyaning “Benfika” klubi safida toʻp suradi. U 2024-yilda Portugaliyaga koʻchib oʻtgan va Irlandiya bosh murabbiyi Kolin OʼBraynning taʼkidlashicha, u “Benfika” akademiyasiga qoʻshilgandan keyin oʻyini sezilarli darajada yaxshilangan.

Umehning akasi Franko ham professional futbolchi boʻlib, hozirda Irlandiyaning U-21 terma jamoasida oʻynaydi.

Eslatib oʻtamiz, 17 yoshgacha boʻlgan futbolchilar oʻrtasidagi FIFA Jahon chempionati joriy yilning 3–27-noyabr kunlari Qatar yashil maydonlarida boʻlib oʻtadi.

Oʻzbekiston U-17 terma jamoasi musobaqa doirasidagi ilk uchrashuvni 5-noyabr kuni Paragvayga qarshi oʻtkazadi.