Illyustrativ foto

AQSH Senati AQSH prezidenti Donald Tramp tomonidan muhim davlat lavozimlariga koʻrsatilgan 107 nafar nomzodni maʼqulladi. Bu haqda idora saytida maʼlum qilindi.

Ovoz berish partiya boʻyicha oʻtdi: 51 respublikachi nomzodlarni qoʻllab-quvvatladi, 47 nafar demokrat esa ularga qarshi ovoz berdi. Koʻpchilik yetakchisi oʻrinbosari Jon Barrasso soʻzlariga koʻra, demokratlar Tramp nomzodlarini tasdiqlash jarayonini muzlatib, Senat ishini toʻxtatib qoʻygan. Uning qoʻshimcha qilishicha, respublikachilar demokratik blokadaga chek qoʻya olgan.

Tasdiqlangan nomzodlar yigirmadan ortiq elchilarni, jumladan, AQSHning Bagama orollaridagi 15-yildagi birinchi elchisi, oʻn nafar prokuror va AQSH Qimmatli qogʻozlar va birjalar komissiyasi rahbarini oʻz ichiga olgan. Bundan tashqari, AQSHning Hindistondagi elchisi lavozimiga Oq uy apparati rahbari Serjio Goraning nomzodi tasdiqlandi.

Endilikda Senat Tramp tomonidan ilgari surilgan yana 26 nafar nomzodni tasdiqlashi kerak. Ularning 16 nafari ijroiya hokimiyati va 10 nafari sud hokimiyati uchun koʻrsatilgan.

AQSHda hukumatining shatdauni (AQSH hukumatining ishini toʻxtatishi Qoʻshma Shtatlardagi vaqtinchalik vaziyat boʻlib, Kongress hukumat idoralarini moliyalashtirish boʻyicha kelisha olmaganida yuzaga keladi. Bu vaqtda muhim boʻlmagan idoralar yopiladi va ularning yuz minglab xodimlari haq toʻlanmaydigan taʼtilga chiqariladi) rasman 1-oktyabrdan boshlandi. Hukumat ishi toʻxtatildi. Bu demokratlar va respublikachilar oʻrtasida sogʻliqni saqlashni moliyalashtirish borasidagi kelishmovchiliklar tufayli yuz berdi. Endi koʻplab davlat xizmatchilari ishdan boʻshatiladi va favqulodda vaziyatlar xizmati xodimlari maoshsiz ishlashga majbur boʻladi.

AQSH vitse-prezidenti Jey Di Vens shatdaun qisqa muddatli boʻlishini aytdi. Unga koʻra, ayrim demokratlar allaqachon oʻz fikridan qaytgan.