Surxondaryo viloyatida atrof-muhitni muhofaza qilish va yashil hududlarni kengaytirishga qaratilgan “Yoshlar bogʻi” loyihasi doirasidagi ishlar izchil davom etmoqda. Shu maqsadda Angor tumanida viloyat hokimligi, Yoshlar ishlari boshqarmasi hamda Oʻzbekiston Yoshlar ittifoqi viloyat Kengashi hamkorligida navbatdagi koʻchat ekish aksiyasi tashkil etildi.

Tadbir davomida 1000 tup manzarali va mevali daraxt koʻchatlari ekildi hamda yangi yashil hudud barpo etildi. Ushbu aksiya aholi, ayniqsa, yoshlar oʻrtasida ekologik madaniyatni yuksaltirish, tabiatga boʻlgan masʼuliyatni kuchaytirishga xizmat qilmoqda.

— Mazkur aksiyada ishtirok etish menga katta xursandchilik bagʻishladi, — deydi tadbir ishtirokchisi Dilmurod Berdiyev. — Yashil hududlarni kengaytirish, ekologik muammolarni hal etish har birimizning burchimiz. Bunday loyihalarda faol qatnashish nafaqat jamiyat uchun foyda, balki yoshlarimizda masʼuliyat tuygʻusini ham oshiradi.

Qayd etilishicha, “Yoshlar bogʻi” loyihasi doirasidagi bunday aksiyalar Surxondaryo viloyatining barcha shahar va tumanlarida tizimli ravishda amalga oshirilmoqda.

Farhod ESONOV, “Xalq soʻzi”.