Oʻzbekiston Respublikasi Qurolli Kuchlari tashkil etilganligining 34 yilligi hamda Vatan himoyachilari kuni munosabati bilan Andijon viloyati bojxona boshqarmasi tashabbusi bilan umumtaʼlim maktablarida rasmlar tanlovi oʻtkazildi. Mazkur tanlov orqali oʻquvchilar harbiy xizmatchilarning fidokorona mehnati, Vatanga sadoqati hamda tinchlik va osudalikning bebaho neʼmat ekanini rangtasvir asarlari orqali ifodaladilar.

Jumladan, Andijon shahridagi 50-sonli umumtaʼlim maktabida boʻlib oʻtgan tanlovda yuzlab oʻquvchilar faol ishtirok etdi. Boshlangʻich va yuqori sinf oʻquvchilari qamrab olingan ushbu tadbirda tasviriy sanʼatga qiziquvchi yoshlar milliy armiyamizga boʻlgan munosabati va tasavvurlarini ijodiy ishlar orqali namoyon etdilar.

— Bu tanlovda men askarlarimizning fidokorona xizmati, Vatanga boʻlgan sadoqatini rasm orqali aks ettirishga harakat qildim, — deydi mazkur maktab oʻquvchisi Sanjarbek Ahmedov. — Ularning jasorati va matonati biz, yoshlar uchun katta ibrat. Kelgusida oʻzim ham harbiy xizmatchi boʻlib, yurtimiz tinchligi va xavfsizligini himoya qilishni orzu qilaman.

Tanlov yakunida yosh toifalari boʻyicha eng chiroyli va mazmunan boy ijodiy ishlar saralanib, gʻoliblar Andijon viloyati bojxona boshqarmasining diplom va esdalik sovgʻalari bilan taqdirlandilar.

Qayd etilishicha, bunday tadbirlar yosh avlodda vatanparvarlik tuygʻularini mustahkamlash, milliy armiyaga boʻlgan hurmatni oshirish hamda ularni ezgu maqsadlar sari yoʻnaltirishda muhim ahamiyat kasb etadi.

Saminjon HUSANOV, “Xalq soʻzi”.