Illyustrativ foto

Soʻnggi paytlarda ijtimoiy tarmoqlarda xodimlarning mehnat huquqlari buzilishiga oid, xususan ish beruvchining aybi bilan xodimga 
oylik maoshini oʻz vaqtida toʻlab berilmayotganligi xususida koʻplab murojaatlar eʼlon qilinmoqda. Ular Adliya vazirligi mutasaddilarining ham eʼtiboridan chetda qolayotgani yoʻq, vakolati doirasida oʻrganilmoqda.

Adliya vazirligi Jamoatchilik bilan aloqalar boʻlimi maʼlumotiga koʻra, Izboskan tumanida yashovchi fuqaro T. Boltaboyev “Feysbuk“ ijtimoiy tarmogʻidagi “Xalq bilan muloqot/Dialog s narodom” guruhiga tumandagi “Andijon viloyat remont-mexanika” korxonasida ishlab kelayotganligi, biroq 2018 yil avgust oyidan buyon ish haqi berilmayotganligi haqida murojaatni joylashtirgan.

Andijon viloyat adliya boshqarmasi tomonidan mazkur holat oʻrganilganda, “Andijon viloyat remont-mexanika” korxonasida fuqaro T. Boltaboyev va yana 24 nafar xodimning bir necha oydan buyon ish haqi toʻlanmasdan kelinayotganligi aniqlandi.

Qonunchilikka koʻra, ish beruvchi oʻzining moliyaviy holatidan qatʼiy nazar, xodimga bajargan ishi uchun haq toʻlashi shart. Mulkchilik shaklidan qatʼiy nazar, korxonalar va tashkilotlar rahbarlari xodimlarga ish haqi oʻz vaqtida va toʻliq toʻlanishi uchun shaxsan javobgardir.

Ammo “Andijon viloyat remont-mexanika” korxonasi maʼmuriyati oʻz majburiyatlarini buzib, 2018 yil 1 noyabr kuniga qadar xodimlarga jami 55 766 474 soʻm ish haqi bermagan.

Yuqoridagilarga asosan, viloyat adliya boshqarmasi tomonidan xodimlar ish haqini zudlik bilan toʻlash yuzasidan korxonaga rasmiy munosabat bildirildi. Natijada xodimlar oldidagi mavjud barcha qarzdorlik toʻliq hisob-kitob qilindi va toʻlab berildi.

Qonun hujjatlari buzilishiga yoʻl qoʻygan bosh hisobchiga nisbatan esa intizomiy jazo chorasi qoʻllanildi.