Иллюстратив фото

Сўнгги пайтларда ижтимоий тармоқларда ходимларнинг меҳнат ҳуқуқлари бузилишига оид, хусусан иш берувчининг айби билан ходимга ойлик маошини ўз вақтида тўлаб берилмаётганлиги хусусида кўплаб мурожаатлар эълон қилинмоқда. Улар Адлия вазирлиги мутасаддиларининг ҳам эътиборидан четда қолаётгани йўқ, ваколати доирасида ўрганилмоқда.

Адлия вазирлиги Жамоатчилик билан алоқалар бўлими маълумотига кўра, Избоскан туманида яшовчи фуқаро Т. Болтабоев “Фейсбук“ ижтимоий тармоғидаги “Халқ билан мулоқот/Диалог с народом” гуруҳига тумандаги “Андижон вилоят ремонт-механика” корхонасида ишлаб келаётганлиги, бироқ 2018 йил август ойидан буён иш ҳақи берилмаётганлиги ҳақида мурожаатни жойлаштирган.

Андижон вилоят адлия бошқармаси томонидан мазкур ҳолат ўрганилганда, “Андижон вилоят ремонт-механика” корхонасида фуқаро Т. Болтабоев ва яна 24 нафар ходимнинг бир неча ойдан буён иш ҳақи тўланмасдан келинаётганлиги аниқланди.

Қонунчиликка кўра, иш берувчи ўзининг молиявий ҳолатидан қатъий назар, ходимга бажарган иши учун ҳақ тўлаши шарт. Мулкчилик шаклидан қатъий назар, корхоналар ва ташкилотлар раҳбарлари ходимларга иш ҳақи ўз вақтида ва тўлиқ тўланиши учун шахсан жавобгардир.

Аммо “Андижон вилоят ремонт-механика” корхонаси маъмурияти ўз мажбуриятларини бузиб, 2018 йил 1 ноябрь кунига қадар ходимларга жами 55 766 474 сўм иш ҳақи бермаган.

Юқоридагиларга асосан, вилоят адлия бошқармаси томонидан ходимлар иш ҳақини зудлик билан тўлаш юзасидан корхонага расмий муносабат билдирилди. Натижада ходимлар олдидаги мавжуд барча қарздорлик тўлиқ ҳисоб-китоб қилинди ва тўлаб берилди.

Қонун ҳужжатлари бузилишига йўл қўйган бош ҳисобчига нисбатан эса интизомий жазо чораси қўлланилди.