ТAСС ахборот агентлигининг хабар беришича, Жаҳон соғлиқни сақлаш ташкилоти коронавирус инфекциясидан касалланишнинг узоқ муддатли давом этиши бўйича тавсияларни ўз ичига олган янгиланган клиник қўлланмани нашр этди. Бу ҳақда Женевада бўлиб ўтган брифингда ЖССТ расмий вакили Маргарет Харрис маълум қилди.

"ЖССТнинг Клиник даволаш бўйича эксперт гуруҳи янги маълумотларга асосланиб, ўз тавсияларини янгилади. Унда "COVID-19нинг сурункали таъсирига" алоҳида эътибор берилди. Одатда соғайиш муддати икки ҳафта бўлсада, айрим одамларда касалликнинг оғир шакли саккиз ҳафтагача давом этмоқда, баъзиларида эса аломатлар анча узоқ муддатгача кузатилмоқда. Беморлар ҳаддан ташқари чарчоқ, доимий йўтал, жисмоний машқларни бажара олмаслик, шунингдек, неврологик ва юрак симптомлари каби аломатлардан азият чекмоқда. Ушбу қўлланмада бу борада жуда кўп маълумотлар мавжуд", дейди М. Харрис.

Унинг эслатиб ўтишича, ЖССТ аввал бошданоқ янги коронавируснинг мутацияга учраши мумкинлигидан хавотирда эди. Шу боис ташкилот мутацияни олдини олиш учун вируснинг тарқалишини камайтириш бўйича чоралар кўришни тавсия қилиб келмоқда.

Харриснинг сўзларига кўра, янги штаммнинг тарқалишини тезлашгани тўғрисида маълумотлар олинган, аммо бу касалликнинг янада оғир кечишини келтириб чиқарадиган далиллар мавжуд эмас. Шу билан бирга, тарқалишнинг юқори даражада бўлиши касалланганлар сонининг ортишига ва шунга мос равишда оғир беморларнинг кўпайишига олиб келиши мумкин.