Иллюстратив фото

АҚШ президенти Дональд Трамп Россия президенти Владимир Путин билан телефон орқали мулоқот қилгани ҳақида хабар берди. Унга кўра, Путин Украинанинг Россия ҳарбий аэродромларига берган зарбаларига жавоб бериш ниятида.

“Бу яхши қўнғироқ бўлди, лекин зудлик билан тинчликка олиб келадиган қўнғироқ эмас”, — дейди Оқ уй раҳбари.

Трампнинг сўзларига кўра, 1 соат 15 дақиқа давом этган суҳбат давомида у Путин билан Россия ҳарбий аэродромларига қилинган ҳужум — Украинанинг “Ўргимчак тури” операциясини муҳокама қилган.

“Президент Путин яқинда аэродромларга уюштирилган ҳужумга жавоб беришга мажбур бўлишини аниқ айтди. Бундан ташқари, АҚШнинг Эрон билан ядровий келишуви муҳокама қилинди. Президент Путинга Эрон ядро қуролига эга бўлмаслигини айтдим ва ўйлайманки, биз бу борада келишиб олдик. Президент Путин Эрон билан музокаралар олиб боришни ва, эҳтимол, бу масалани тез якунига етказишда ёрдам беришни таклиф қилди”, — дейди Трамп.

Бу Трампнинг Оқ уйга қайтганидан кейин Путин билан тўртинчи телефон орқали мулоқоти. Бундан олдинги суҳбат 19 май куни бўлиб ўтган эди.

Шу йилнинг 1 июнь куни Украина Хавфсизлик хизмати «Ўргимчак тўри» операцияси давомида Россия стратегик авиация самолётларининг 34 фоизи шикастлангани ҳақида хабар берди. Иркутск, Рязан, Мурманск ва Иваново вилоятларидаги ҳарбий аэродромларга яқин атрофдаги юк машиналаридан масофадан учирилган дронлар орқали ҳужум қилинди. Москва самолётларга зарар етганини тасдиқлади, аммо уларнинг сонини очиқламади. Мустақил ҳарбий экспертлар сунъий йўлдош суратлари асосида камида 13 та рус самолётига зарар етказилганини маълум қилди.

Шу йилнинг апрель ойи ўрталарида АҚШ ва Эрон янги келишув бўйича музокараларни бошлаган эди. Ўтган бешта мулоқот натижасиз якунланди. Трамп президентликка қайтганидан бери Теҳрон билан янги келишувга интилиб, музокаралар муваффақиятсизликка учраса, ҳарбий чоралар кўриш билан таҳдид қилиб келмоқда.