Украина президенти Владимир Зеленский Ўзбекистонда рўйхатдан ўтган учта компанияга нисбатан санкциялар жорий қилди. Бу ҳақда президент фармони унинг расмий сайтида эълон қилинди.

Фармонга кўра, Россиянинг 67 та, Хитой, Эрон, Беларус ва Ўзбекистонда рўйхатдан ўтган 7 та компания, шунингдек, Россиянинг 58 нафар фуқароси санкциялар рўйхатига киритилган. Санкцияларга ҳарбий-саноат мажмуасига алоқадор металлургия, машинасозлик, кимё ва самолётсозлик соҳаларидаги корхоналар, шунингдек, Россия ҳарбий-саноат комплекси билан ҳамкорлик қилувчи бир қанча конструкторлик бюролари ҳам тушган.

Санкция жорий этилган ўзбекистонлик компаниялар орасида Тошкентда жойлашган «Mercury Renaissance» МЧЖ қўшма корхонаси мавжуд. Ушбу компания 2016 йилда ташкил этилган бўлиб, қурилиш техникаси ва жиҳозларини ижарага бериш ҳамда лизинг асосида фойдаланиш фаолияти билан шуғулланади. Унинг таъсисчилари сифатида Муминов Рустам (60%) ва Глухов Михаил (40%) кўрсатилган.

Шунингдек, Жиззах вилоятида жойлашган «Raw Materials Cellulose» МЧЖ ҳам санкциялар рўйхатига киритилди. 2017 йилда ташкил этилган бу корхона ёғоч массаси ва целлюлоза ишлаб чиқаришга ихтисослашган бўлиб, унинг таъсисчиси Уткина Лариса Михайловна ҳисобланади.

Учинчи компания – «Фарғона кимё заводи» МЧЖ 2012 йилда рўйхатдан ўтган бўлиб, худди шундай фаолият билан шуғулланади. Қайд этилишича, бу корхонанинг асосий таъсисчиси айнан «Mercury Renaissance» ҳисобланади.

Ҳар учала компанияга нисбатан 10 йил муддатга санкциялар жорий этилган бўлиб, улар Украина ҳудудидаги активларни музлатиш, ҳар қандай лицензияларни бекор қилиш, савдо ва интеллектуал мулкка оид келишувларни тўхтатиш, маданий ва илмий ҳамкорликларни чеклаш каби чоралардан иборат.