Кейинги йилларда мамлакатимизда амалга оширилаётган кенг кўламли ислоҳотлар натижасида қишлоқ хўжалигида ҳам юқори натижаларга эришилмоқда. Жумладан, 2025 йилда Самарқанд вилоятида қишлоқ хўжалиги маҳсулотларини етиштириш ва экспорт қилиш ҳажми сезиларли даражада ошди.

Йил давомида вилоятдан жами 316 миллион долларлик 303 минг тонна мева-сабзавот маҳсулотлари Россия, Хитой, Туркия, Украина, АҚШ, Польша каби 61 та давлатга экспорт қилинди. Бу кўрсаткич олдинги йилга нисбатан 75 миллион долларга кўпдир.

Хусусан, Самарқанд туманида фаолият юритаётган «Шавкат Убайдов боғлари» экспортёр корхонаси 50 турдан ортиқ қишлоқ хўжалиги маҳсулотларини ташқи бозорларга етказиб бермоқда. Асосий экспорт маҳсулотлари қаторига карам, пиёз, олма, олхўри, шафтоли, лавлаги ҳамда бошқа кўплаб мева-сабзавот турлари киради.

Корхонада мавсумий равишда 100 нафар, доимий асосда эса 20 нафар ишчи меҳнат қилмоқда. Айни пайтда корхона мавсум давомида 1 000 тонна карамни Россия Федерациясига экспорт қилиш бўйича шартнома имзолаган бўлиб, йиллик даромади 1 миллион АҚШ долларидан ортиқни ташкил этади.

Абдулазиз ЙЎЛДОШЕВ, «Халқ сўзи».