«Тажен» (Қозоғистон) – «Довут-ота» (Ўзбекистон) чегара ўтказиш пункти орқали чегарани кесиб ўтишга қўйилган чеклов жорий йилнинг 31 декабрь кунига қадар узайтирилди. Бу ҳақда Ўзбекистон Божхона қўмитаси матбуот хизмати хабар берди.

Қозоғистон Молия вазирлиги Давлат даромадлари қўмитасининг маълум қилишича, «Тажен» (Ўзбекистон Республикасининг «Довут-ота» чегара божхона постига туташ) чегара ўтказиш пункти орқали жисмоний шахслар, енгил автомобиллар, автобуслар ҳамда рухсат этилган тўлиқ вазни 3,5 тоннадан ошмайдиган юк автомобиллари ҳаракати бўйича жорий йил 1 февраль санасидан киритилган чекловлар 2025 йилнинг 31 декабрига қадар узайтирилган.

Қайд этилишича, чеклов муддатининг узайтирилиши мазкур ўтказиш пунктларида иккинчи босқич қурилиш ишлари, хусусан, маъмурий биноларда капитал таъмирлаш ҳамда йўл қопламаларида бетонлаш ишлари олиб борилаётганлиги сабабли Қозоғистон томонидан жисмоний шахслар ва транспорт воситаларининг хавфсизлигини таъминлаш, қурилиш ва реконструкция ишларини жадаллаштириш мақсадида жорий этилмоқда.

Рухсат этилган тўлиқ вазни 3,5 тоннадан ортиқ бўлган юк автомобиллари «Тажен» (Қозоғистон) – «Довут-ота» (Ўзбекистон) чегара ўтказиш пункти орқали ҳаракатни амалга ошириши мумкин. Шунингдек, жисмоний шахслар учун «Қорақалпоғистон» темир йўл ўтказиш пункти орқали «Нукус-Бейнеу» йўналишида қўшимча йўловчи поездлари қатнови йўлга қўйилган.

Эслатиб ўтамиз, мазкур назорат-ўтказиш пунктида қурилиш ишлари олиб борилиши муносабати билан дастлаб, жорий йилнинг 1 февраль санасидан бошлаб 3 ой муддатга вақтинча ҳаракат чеклови жорий қилинган эди. Бироқ кейинчалик ишлар тўлиқ якунланиши қўшимча вақт талаб қилгани боис, ушбу муддат яна 4 ой — 2025 йил 1 сентябргача узайтирилди.