Президент Шавкат Мирзиёев Қирғизистон Президенти Садир Жапаровга унинг Самарқандда ЮНEСКО Бош конференцияси 43-сессиясининг очилиши муносабати билан йўллаган табрикномасига жавобан мактуб йўллаб, Қирғизистон томони ушбу тадбирга нуфузли делегациясини юборгани учун миннатдорлик изҳор этди.

«Мазкур халқаро форумнинг қарийб қирқ йил ичида илк бор ЮНEСКО Бош қароргоҳидан ташқарида, қадимий ва улуғ Самарқанд шаҳрида ўтказилаётгани — Марказий Осиё минтақасининг умумий муваффақияти, шунингдек, Ўзбекистоннинг халқаро майдондаги обрў-эътибори тобора ортиб бораётганидан далолат эканига доир илиқ фикрларингиз биз учун жуда қадрли.

Конференция доирасида илгари сурилган муҳим ташаббуслар ҳамда қабул қилинадиган қарорлар таълим, фан ва маданият соҳасида глобал ҳамкорликнинг янги уфқларини очиши, ўзаро дўстлик ва ишонч муҳитини янада мустаҳкамлашига доир фикрларингизга тўлиқ қўшиламан.

Ишончим комилки, ўртамиздаги чин қардошлик ришталари тобора мустаҳкамланиб бораётгани, бўлажак олий даражадаги мулоқотларимиз эса стратегик шериклигимизни янада юксак босқичга кўтаришга хизмат қилади», — дейилади мактубда.