Ҳукуматнинг Ёшлар ишлари агентлиги фаолиятини тартибга солиш соҳасидаги норматив-ҳуқуқий ҳужжатларни тасдиқлашга оид қарори лойиҳаси муҳокамага қўйилди.

Лойиҳада келтирилишича, Агентлик ва унинг ҳудудий бўлинмалари ҳузурида юридик шахс мақомига эга бўлмаган «Ёшларга оид давлат сиёсатини қўллаб-қувватлаш» жамғармаси этилади.

Жамғарма маблағлари Молия вазирлиги Ғазначилигида очилган Агентликнинг миллий ва хорижий валюта бўйича бюджетдан ташқари шахсий ғазна ҳисоб варағида йиғилади.

Қуйидагилар Жамғарма маблағларини шакллантириш манбалари ҳисобланади:

ёшларга оид давлат сиёсатини қўллаб-қувватлаш бўйича харажатларни молиялаштириш учун Жамғармага Ўзбекистон Республикаси Давлат бюджети ҳисобидан ҳар йили ажратиладиган маблағлар;

муассиси Агентлик ҳисобланган корхона, муассаса ва ташкилотлар, ихтиёрида солиқлар ва бошқа мажбурий тўловлар тўланганидан кейин қоладиган соф фойда;

жисмоний ва юридик шахсларнинг хайрия маблағлари, халқаро молия институтлари ва хорижий ташкилотларнинг грантлари, вақтинча бўш маблағларни тижорат банкларининг депозитларига жойлаштиришдан олинган даромадлар;

қонун ҳужжатларида тақиқланмаган бошқа манбалар.

Жамғарманинг маблағларидан қуйидагилар учун фойдаланилади:

Ўзбекистон Республикаси Президентининг «Ўзбекистон Республикасида ёшларга оид давлат сиёсатини тубдан ислоҳ қилиш ва янги босқичга олиб чиқиш чора-тадбирлари тўғрисида» 2020 йил 30 июндаги ПФ–6017-сон Фармони ҳамда 2020 йил 25 декабрда ўтказилган «Ўзбекистон ёшлари» форумида белгиланган Агентликнинг асосий вазифа ва фаолият йўналишлари доирасидаги чора-тадбирларни молиялаштириш;

бешта муҳим ташаббусни кенг жорий этишга қаратилган тадбирларни молиялаштириш;

ҳудудлардаги ёшлар объектларини капитал ва жорий таъмирлаш ҳамда уларни инвентарлар, мебель, компьютер техникаси ва бошқа ускуналар билан жиҳозлаш ҳамда соҳага замонавий ахборот-коммуникация технологияларини жорий этиш;

мамлакатимизда ёшларни қўллаб-қувватлаш, ўсиб келаётган

ёш авлодни илм-фан ва инновацияларга кенг жалб этиш билан боғлиқ чора-тадбирларни молиялаштириш;

ёшларга оид дастурлар, лойиҳалар, илмий-тадқиқот ишлари ва бошқа тадбирлар учун ижтимоий буюртма, грант ва субсидиялар ажратиш;

ҳудудларда банд бўлмаган ёшларни ижтимоий қўллаб-қувватлаш ва уларнинг бандлигини таъминлаш мақсадида касб-ҳунарга ўргатиш ва уларда касбий кўникмаларни шакллантириш тадбирларини молиялаштириш;

тарбия муассасаларини тамомлаган етим ва ота-онасининг қарамоғидан маҳрум бўлган ёшларнинг ижтимоий-ҳуқуқий ҳимоясини ташкил этиш ва бандлигини таъминлаш тадбирларини молиялаштириш;

халқаро таълим дастурлари (IELTS, TOEFL, GMAT ва бошқалар) бўйича энг юқори балл тўплаган иқтидорли ёшларга имтиҳон топшириш харажатларини тўлиқ қоплаб бериш;

ёш кадрларни, шу жумладан Агентлик тизимидаги ходимларни ўқитиш, малакасини ошириш, уларнинг стажировка ўташи, шу жумладан хорижий мамлакатларда ўтказиладиган конференция, семинарлар ва бошқа тадбирларда иштирок этишини ташкил этиш, Агентлик ходимларини ижтимоий қўллаб-қувватлаш.

Жамғарманинг жорий йилда фойдаланилмаган маблағлари (қолдиқ маблағлар) Ўзбекистон Республикаси Давлат бюджетига олиб қўйилмайди ва улардан кейинги йилда мазкур Низомда назарда тутилган тартибда фойдаланилади.