Доналд Трамп сайлов олдидан берган ваъдаларини бажаришни бошлади. У Кристен Уэлкерга берган интервьюсида ноқонуний бўлган барчани депортация қилишдан бошқа танлов йўқлигини айтган.

Трамп шунингдек, Конституциянинг 14-тузатишида узоқ вақтдан бери мустаҳкамлаб қўйилган туғма фуқароликни тугатмоқчи.

Бу режага қаршилар ҳам бор. Улар қонун ўзгариши конституцияга зид бўлиши мумкин деб ҳисоблайди. Чунки АҚШ Конституциясига киритилган 14-тузатиш мамлакат ҳудудида туғилган барча шахсларга фуқаролик ҳуқуқини беришни назарда тутади.

Мутахассислар фикрига кўра, тегишли ҳуқуқни бекор қилиш нафақат президент фармонини, балки Конституцияга ўзгартириш киритишни ҳам ўз ичига олган мураккаб ҳуқуқий ва қонунчилик далилларини талаб этади.

Бу ҳаракатлар Трамп президентлик компаниясининг асосий ваъдаси бўлган оммавий депортация режаси ишлай бошлаганидан дарак беради. Унинг илк босқичи жиноят содир этган, ҳужжатсиз муҳожирларни қамраб олади. Кейинчалик депортация кўлами кенгайиб боради.

“Биз жиноятчиларни мамлакатимиздан чиқариб юборишимиз керак“, — деган АҚШ президенти.