Фото: UNESCO

Бугун, 6 ноябрь куни Самарқандда бўлиб ўтаётган UNESCO Бош конференциясининг 43-сессиясида ташкилотнинг янги бош директори этиб мисрлик Холид Ал-Энаний сайланди. У 174 овоздан 172 тасини олди. Янги раҳбар 15 ноябрда лавозимни Одри Азулеи (2017 йилдан буён бу вазифани бажариб келаётган)дан қабул қилиб олади.

Холид Ахмад Ал-Энаний Али Эзз — 1971 йилда туғилган мисрлик египтолог, Ҳелуан университети профессори. У 30 йилдан ортиқ вақт давомида ушбу таълим муассасасида дарс бериб келмоқда. Ал-Энаний 2016–2022 йилларда Миср Араб Республикасининг Маданият ва Туризм ҳамда Қадимий ёдгорликлар вазири сифатида фаолият юритган. Шунингдек, Қоҳирадаги Миср цивилизацияси миллий музейи ва Миср музейига раҳбарлик қилган.

Ал-Энаний 2024 йил ноябрь ойида Жаҳон туризм ташкилоти томонидан Маданий туризм бўйича махсус элчи этиб тайинланган, шунингдек, Африка жаҳон мероси жамғармаси ҳомийсидир. У араб, француз ва инглиз тилларида эркин сўзлаша олади.

Холид Ал-Энаний UNESCO тарихида 12-бош директор бўлди. У араб давлатларидан сайланган илк бош директор ва Африка қитъасидан бу лавозимни эгаллаган иккинчи шахс ҳисобланади.