Фото: Юнус Бўриев/«Халқ сўзи»

Анқара — Туркия Республикасининг пойтахти, мамлакатнинг сиёсий, маъмурий ва маданий маркази ҳисобланиб, қадимий тарих ва замонавий ҳаёт уйғунлашган шаҳар ўзининг сокин муҳити ва ўзига хос қиёфаси билан кўплаб сайёҳларнинг эътиборини тортади.

Айни вақтда ушбу мамлакатда бўлиб турган «Халқ сўзи» ва «Народное слово» газеталари таҳририяти фотомухбири шаҳарнинг гўзал манзараларини камера объективига муҳрлади.

Анқара шаҳри географик жойлашуви ва иқлим шароитига кўра, Туркиянинг бошқа шаҳарларидан фарқ қиладиган ўзига хос табиатга эга. Баланд тепаликлар устида жойлашган шаҳардан кенг манзаралар кўзга ташланади.

Шаҳарнинг марказий қисмида жойлашган Қизилай майдони доимо маҳаллий аҳоли ва меҳмонлар билан гавжум. Ушбу ҳудуд пойтахтнинг энг фаол ҳаёт кечаётган нуқталаридан бири ҳисобланади.

Бундан ташқари, Анқаранинг энг машҳур тарихий масканларидан бири — Аниткабир мажмуаси ҳисобланиб, ушбу ёдгорлик Туркия Республикасининг асосчиси Мустафо Камол Отатурк хотирасига бағишлаб барпо этилган.

Шаҳардаги боғлар, маданий масканлар ва замонавий иншоотлар пойтахт қиёфасини янада бойитади. Шаҳар кўчалари бўйлаб сайр қилган ҳар бир меҳмон Анқаранинг сокин, мазмунли ҳаётини ҳис этади.

Юнус БЎРИЕВ, Отабек САИДАҲМАДОВ

«Халқ сўзи».