Жорий йилнинг 19-21 сентябрь кунлари Риштон туманида иккинчи Халқаро кулолчилик форуми бўлиб ўтади. Айни кунларда ушбу нуфузли анжуманга юқори савияда тайёргарлик кўрилмоқда.

Шу мақсадда туман миқёсида кенг кўламли қурилиш-бунёдкорлик ишлари олиб борилиб, кулолчилик марказлари, тарихий-маданий иншоотлар замонавий қиёфага эга бўлаётир. Янги туризм маршрутлари ишлаб чиқиш, савдо-хизмат кўрсатиш тармоқлари фаолиятини кенгайтириш, тажрибали кулоллар иштирокида маҳорат дарслари ташкил этиш, уй-меҳмонхоналари очиш каби вазифалар ижросига ҳам алоҳида эътибор қаратилмоқда.

— Дунёнинг ўнлаб давлатлари, қолаверса, мамлакатимизнинг барча ҳудудларидан кулоллар, сайёҳлар ташриф буюриши кутилаётган анжуманга тайёргарлик ишлари жараёнида форум ўтказиладиган ҳудудларни комплекс равишда ободонлаштириш ишлари изчил давом этмоқда, — дейди Фарғона вилояти ҳокими ўринбосари Хуршиджон Аҳмедов. — Бу борада мавжуд инфратузилмани янада яхшилаш ҳамда меҳмонларни муносиб кутиб олишга доир чора-тадбирлар режаси ишлаб чиқилган.

Риштон туманида ўтказиладиган II Халқаро кулолчилик форумида барча ишлар юқори савияда ташкил этилиши учун масъулларга аниқ вазифалар ва бажарилиш муддатлари белгилаб берилган.

Ботир МАДИЁРОВ,

«Халқ сўзи».