Фото: Reuters

Италия, Франция ва Германия Фаластиннинг ҲАМАС ҳаракатига қарши фавқулодда санкциялар жорий этишга чақирмоқда. Бу ҳақда “Reuters“ агентлиги уч давлатнинг Европа дипломатияси раҳбари Жозеп Боррелга йўллаган мактубига таяниб хабар бермоқда.

“Биз ҲАМАС ва унинг тарафдорларига қарши фавқулодда санкция режимини яратиш таклифини тўлиқ қўллаб-қувватлашимизни билдирамиз”, — дейилади агентлик хабарида уч давлатнинг қўшма мактуби матнидан иқтибос келтирилиб.

“Reuters“нинг ҳужжатга таяниб қайд этишича, ушбу санкциялар режимининг эрта жорий этилиши Европа Иттифоқининг ҲАМАСга қарши мажбуриятлари ва давлатларнинг Исроил билан бирдамлиги ҳақида кучли “сиёсий сигнал” беради.

Яқин Шарқдаги вазият 7 октябрь куни Ғазо секторидан Исроилга Фаластиннинг ҲАМАС ҳаракати жангариларининг кириб келиши, Исроил билан чегарадош ҳудудлар аҳолисининг ўлдирилиши ва 200 нафардан ортиқ, жумладан, болалар, аёллар ва қарияларнинг гаровга олин олиниши билан кескин ёмонлашди. ҲАМАС ҳужумни Исроилнинг Қуддусдаги Ал-Ақсо масжидига қарши ҳаракатларига жавоб деб атади.

Исроилда, расмийларнинг сўнгги маълумотларига кўра, ҲАМАС ҳужумлари оқибатида тахминан 1,2 минг киши ҳалок бўлган, бу рақам тинч аҳоли, аскарлар, чет эл фуқаролари ва ишчиларни ўз ичига олади. Шунингдек, 5 мингдан ортиқ одам тан жароҳати олган.

Бунга жавобан Исроил мудофаа кучлари Ғазо секторида ҲАМАСга қарши “Темир қиличлар” операциясини бошлади. Бир неча кун ичида Исроил ҳарбийлари Ғазо билан чегарага яқин бўлган барча аҳоли пунктларини назорат остига олди ва чизиқдаги нишонларга, жумладан, тинч аҳолига ҳаводан зарбалар беришни бошлади. Шунингдек, Исроил Ғазо секторини тўлиқ блокадага олганини эълон қилди: сув, озиқ-овқат, электр энергияси, дори-дармон ва ёқилғи етказиб бериш тўхтатилди.

Октябрь ойининг охирида Исроилнинг анклавдаги операциясининг қуруқлик босқичи бошланди. Ғазо шаҳри Исроилнинг қуруқликдаги кучлари томонидан ўраб олинган ва анклав амалда жанубий ва шимолий қисмларга бўлиниб қолган.

Исроил ҳужумлари бошланганидан бери Ғазо секторида ҳалок бўлганлар сони 16 мингдан ошди, 35 мингдан ортиқ киши жароҳат олди.