Душанба куни Ироқ ғарбидаги Айн ал-Ассад авиабазасига иккита «Катюша» ракетаси учирилди. Бу ҳақда Ироқ хавфсизлик хизматидаги икки манба «Reuters»га хабар қилган. Ироқдаги манбалардан бирининг айтишича, ракеталар база ичига тушган. Ҳужум ҲАМАС етакчисининг ўлдирилиши ортидан Эроннинг ўч олиш зарбасими ёки йўқ, ҳозирча номаълум.

«Associated Press» ахборот агентлиги АҚШ мудофаа расмийларига таяниб, етти нафар ҳарбий хизматчи ва тинч аҳоли вакиллари жабрланганини айтди. Ҳозирда кўрилган зарар баҳоланмоқда.

АҚШ Мудофаа вазири Ллойд Остин ва Исроил мудофаа вазири Ёав Галлант душанба куни телефон орқали гаплашиб, ҳужум хавфи ошиб бораётганини билдирган. Ўтган ҳафта Исроилнинг Байрутга уюштирган ҳужуми натижасида Ливандаги «Ҳизбуллоҳ» гуруҳининг юқори даражали қўмондони Фуад Шукир ҳам ўлдирилган эди. Эронга кўра, АҚШ Ҳания ўлимида Исроилни қўллаб-қувватлаган ва жавобгарликни бўйнига олиши керак. Яҳудий давлати эса ҳозирча жавобгарликни ўзидан соқит қилмоқда.

Ҳар икки томон ҳам кенг қамровли урушга тайёр эмас, аммо кескинлик кучайиши тўқнашув хавфи юқори эканлигини англатади. АҚШ ва Эроннинг камдан-кам иттифоқчиси бўлган Ироқ 2500 америкалик аскарни ҳудудига киритган эди.