Фото: «Anorbank»

«Anorbank» акциядори Қаҳрамон Олимов Франция пойтахти Парижда ўғирлаб кетилди ва 2 кун тутқунликда ушлаб турилганидан сўнг товон пули эвазига қўйиб юборилди. Бу ҳақда «Le Monde» нашри хабар берди.

Нашрнинг ёзишича, 48 ёшли банк эгаси жорий йилнинг 21 июнь куни Тошкентдаги Ислом Каримов халқаро аэропортидан Истанбул орқали Парижга учиб кетган. Эртаси куни у Париждаги «Sofitel Arc-de-Triomphe» меҳмонхонасидан 9 кечага жой банд қилган ва жойлашган.

Ўша куниёқ меҳмонхона барида унга рус ва инглиз тилларида гапириб, ўзини Анастания деб таништирган, Туркияда гўзаллик салонида ишлашини айтган аёл яқинлашиб, суҳбат таклиф қилган. Манбага кўра, ўзбекистонлик молия магнатининг ўғирланиш воқеаси шу тариқа бошланган.

Қайд этилишича, Олимов 23 июнь куни Парижнинг 8-туманида ўғирлаб кетилган ва Ницца яқинидаги вилланинг ертўласига олиб борилган. У ўша ерда калтакланган, жиноятчилар ҳатто унинг бўйнига пичоқ тортиш билан таҳдид қилган.

Банк раҳбари 2 кун тутқунликда ушлаб турилганидан сўнг, 25 июнда гаров эвазига қўйиб юборилган. Жабрланувчи ўша куни Париждаги «Hôtel-Dieu» шифохонасида кўрикдан ўтказилган. Шифокор унинг танасида кўкарган жойлар ва яралар борлигини қайд этган. Бироқ Қаҳрамон Олимовнинг асосий шикояти – ҳаддан ташқари хавотир ва уйқу билан боғлиқ муаммолар бўлган.

Ҳолат юзасидан «гуруҳ бўлиб, шахсни ноқонуний ушлаб туриш» моддаси билан жиноят иши қўзғатилган ва бир киши қамоққа олинган.

Маълум бўлишича, Қаҳрамон Олимов Нидерландияда рўйхатдан ўтган компания орқали Франциянинг EDF компанияси билан ҳамкорликда Сурхондарё вилоятида газ циклли электр станцияси қурилишида иштирок этмоқда. У Парижга айни шу лойиҳа сабабли борган бўлган.