Фото: Муҳсин Умурзоқов / «Халқ сўзи»

Ёзги олимпия ўйинлари дастуридан ўрин олган, оммавийлиги жиҳатидан футболдан кейин иккинчи ўринда турувчи ва бугунги кунга келиб дунёнинг 4 миллиарддан ортиқ аҳолиси севиб томоша қиладиган спорт турига айланиб улгурган крикет Ўзбекистонда ҳам жадаллик билан оммалашмоқда.

Хусусан, бугун, 1 декабрь куни Ўзбекистон миллий матбуот марказида крикет федерациясининг йил якунларига бағишланган матбуот анжумани бўлиб ўтди. Тадбирда Ўзбекистон Крикет Федерацияси президенти Азиз Миҳлиев ва Федерация Бош котиби Фазлиддин Ибодуллаев иштирок этди. Анжуманда Федерация томонидан амалга оширилган ишлар атрофлича таҳлил қилинди.

Ўзбекистон крикет федерацияси 2019 йилда ташкил этилган. Ҳозирда Ўзбекистон крикет федерацияси Осиё ва Халқаро Крикет Кенгашининг расмий аъзоси саналади. Фаолиятига ҳали унча кўп бўлмаган Федерация томонидан ҳозиргача 6 та 13 ёшгача, 4 та 19 ёшгача, 4 та катталардан иборат хамда 9 та хотин-қизлар жамоалари ташкил этилган. Бундан ташқари, Ўзбекистонда истиқомат қилиб, турли соҳаларда меҳнат қилаётган чет эллик мутахассислардан иборат 2 та жамоа ҳам шаклланган.

Мамлакатимизнинг Тошкент шаҳри, Қашқадарё, Фарғона, Самарқанд, Тошкент, Сурхондарё, Бухоро ва Хоразм сингари вилоятларида ҳам жамоалар мавжуд. Утган давр мобайнида йиғилган жамоалар ўртасида крикет бўйича мусобақалар режага кўра ўтказиб келинмоқда. Шу билан бирга ЎКФ томонидан айни пайтда крикет бўйича эркаклар ва аёллардан иборат терма жамоалар шакллантирилиб, навбатдаги ёзги олимпия ўйинларига тайёргарлик бошлаб юборилган.

Федерация ушбу спорт тури ривожи йўлида халқаро ҳамкорликка ҳам алоҳида эътибор қаратади. Бунга қадар крикет ривожланган Англия, Ҳиндистон, Покистон сингари бир нечта давлатларнинг крикет кенгашлари билан меморандумлар имзоланган.

Бугун, 1 декабрь куни Афғонистон крикет кенгаши вакиллари билан ҳам меморандум имзоланди. Унда Ўзбекистон Крикет Федерацияси президенти Азиз Миҳлиев, Крикет Федерацияси Бош котиби Фазлиддин Ибодуллаев, Афғонистон Крикет Кенгаши Бош котиби Насиб Хон, Афғонистон Крикет Кенгаши аъзоси Ҳолид Ҳотам ҳамда дипломат Магфуруллоҳ Шаҳоб каби амалдорлар иштирок этди.

Қатнашчилар ушбу битим мамлакатимизда мазкур олимпия спорт турининг янада ривожланишига хизмат қилишини айтиб ўтди.

Ўзбекистон Крикет Федерацияси президенти Азиз Миҳлиев меморандумнинг аҳамияти ҳақида тўхталар экан, Афғонистоннинг ушбу спорт туридаги ютуқларидан андаза олиш, уни ривожлантириш ва аҳоли ўртасида кенг тарғиб қилишдаги йўлини ўрганиш нечоғлик муҳим эканини таъкидлади. Шунингдек, у яхши қўшничилик муносабатлари ҳам жуда муҳим эканини алоҳида қайд этди.

«Президентимиз Шавкат Мирзиёев ҳар чиқишларида, ЮНEСКОнинг учрашувларида ҳам бир қатор мажлисларда ҳам айтиб ўтдиларки, Афғонистонда тинчлик бўлса бизда ҳам тинчлик бўлади. Яъни «қўшнинг тинч, сен тинч!»

Афғонистонда бугунги кунда юзлаб қабилалар, элликдан ошиқ тиллар мавжуд, лекин шунга қарамасдан крикет спорт тури сифатида мамлакатдаги миллат ва элатларни мана шундай бирлаштиради. Афғонистон ички сиёсатидаги вазиятга қарамасдан крикет миллий жамоаси Осиёда иккинчи ўринда туради.

Афғонистон билан имзоланаётган меморандум ҳақида тўхталадиган бўлсак, улар айнан Ўзбекистонда ривожланиб келаётган крикетчиларга техник йўналишда ёрдам бериш, уларга ўйин қоидалари, мураббийлик, ҳакамлик, шунингдек, ўйинларни ташкил қилиш ва ўтказиш тартиби, қоидалари ҳамда шу кабиларда ёрдам беришга қарор қилишган», деди Азиз Миҳлиев.

Афғонистон Крикет Кенгаши аъзоси Ҳолид Ҳотам Ўзбекистон Крикет Федерацияси президентининг гапларини тасдиқлар экан, бу спорт тури Афғонистондаги миллатлараро муносабатларни яхшилаш учун яхши йўл бўлганини қайд этди.

Бундан ташқари у Афғонистондаги сиёсий вазият яқин-яқингача ҳам барқарор бўлмаган бир вақтда крикет спорт тури шунчалик ривожланганини, Ўзбекистонда ҳукм сураётган тинчлик ва спортга катта эътибор қаратилаётган бир вақтда жуда юксак натижаларга эришиш мумкинлигига ишонч билдирди.

Шунингдек, икки мамлакат спортчилари мусобақаларга тайёргарлик кўриш жараёнида ҳам ўзаро ўйинлар ўтказиши, тажриба алмашишига имконият яратилиши режа қилингани айтилди. Бунда Афғонистон жамоаларини Ўзбекистонга, Ўзбекистон жамоаларини Афғонистонга таклиф қилиб, у ерда халқаро ўйинлар ўтказиш кўзда тутилган.

Анжуманда сўз олган Азиз Миҳлиев крикет спорт турининг Ўзбекистонда қай даражада оммалашаётгани ҳамда Федерациянинг келгуси режалари ҳақида ҳам тўхталди.

«Ўзбекистонда бу спорт тури жадал суратларда ривожланмоқда, хусусан бу йил иккита катта ютуққа эга бўлдик. Биринчиси Осиё Крикет кенгашига аъзолик бўлса, иккинчиси Ўзбекистон давлат жисмоний тарбия ва спорт университетида Крикет факультети ташкил этилгани бўлди.

Кейинги мақсадларимиз Олимпия мактабларида крикет спорт турини таништириш ва иложини қила олсак, бошланғич ва ўрта таълим мактабларидаги жисмоний тарбия дарсларига ҳам крикетни олиб киришдир.

Крикет стадионини ташкил қилишга муваффақ бўлдик, аммо ҳали ҳам инфраструктура бўйича бироз камчиликлар мавжуд. 2026 йилнинг март ойида тўлиқ ўт қоплама тайёр бўлади, шундан сўнг Осиё Крикет кенгаши ва Халқаро Крикет кенгашидан махсус вакиллар келиб, стадионимизни инспекциядан ўтказади», дейди Ўзбекистон Крикет Федерацияси президенти.

Миҳлиевнинг қўшимча қилишича, стадион текширувлардан муваффақиятли ўтадиган бўлса, Осиё Крикет кенгаши ва Халқаро Крикет кенгаши ўзининг U-17 ва U-19 мусобақаларини Ўзбекистонда ташкиллаштириши ҳам мумкин.

Тадбир сўнгида томонлар бир-бирларига эсдалик совғаларини тақдим этди ҳамда биргаликда расмга тушди.

Муҳсин УМУРЗОҚОВ,
«Халқ сўзи»​​​​​