Саминжон ҲУСАНОВ/«Халқ сўзи». Республикамизда тадбиркорлик фаолиятини ривожлантириш, қулай инвестиция муҳитини яратиш борасида амалга оширилаётган ишлар хорижий тадбиркорларнинг мамлакатимизга бўлган эътиборини оширмоқда.

— Ўзбекистонда чет эллик инвесторлар учун қулай ишбилармонлик муҳити яратилганлиги хитойлик тадбиркорларда катта қизиқиш уйғотди, — дейди Булоқбоши туманидаги «Andijon WCC sement zavodi» МЧЖ хорижий корхонаси директорининг ўринбосари Жиянг Шаопинг. — Натижада 250 миллион долларлик сармоя киритишга қарор қилдик. 2022 йилда заводнинг қурилиш ишларига киришилган бўлса, жорий йилнинг май ойидан тўлиқ қувват билан ишлай бошлади. Ҳозирда корхонамизда 3 хил цемент хом ашёсидан ташқари бир неча турдаги қурилиш маҳсулотлари ҳам ишлаб чиқарилмоқда. Заводнинг иш бошлаши 350 нафар янги иш ўрнининг яратилишига сабаб бўлди. Йил якунига қадар бу кўрсаткич яна 200 тага ортади.

40 гектар майдонда бунёд этилган корхонанинг йиллик ишлаб чиқариш қуввати 2,5 миллион тоннани, экспорт қуввати 10 миллион долларни ташкил этади. Ҳозирда маҳсулотлар ички бозорга йўналтирилаётган бўлсада, тез орада Европа давлатларига экспорт қилиниши кўзда тутилган.