Saminjon HUSANOV/“Xalq soʻzi”. Respublikamizda tadbirkorlik faoliyatini rivojlantirish, qulay investitsiya muhitini yaratish borasida amalga oshirilayotgan ishlar xorijiy tadbirkorlarning mamlakatimizga boʻlgan eʼtiborini oshirmoqda.

— Oʻzbekistonda chet ellik investorlar uchun qulay ishbilarmonlik muhiti yaratilganligi xitoylik tadbirkorlarda katta qiziqish uygʻotdi, — deydi Buloqboshi tumanidagi “Andijon WCC sement zavodi” MCHJ xorijiy korxonasi direktorining oʻrinbosari Jiyang Shaoping. — Natijada 250 million dollarlik sarmoya kiritishga qaror qildik. 2022-yilda zavodning qurilish ishlariga kirishilgan boʻlsa, joriy yilning may oyidan toʻliq quvvat bilan ishlay boshladi. Hozirda korxonamizda 3 xil sement xom ashyosidan tashqari bir necha turdagi qurilish mahsulotlari ham ishlab chiqarilmoqda. Zavodning ish boshlashi 350 nafar yangi ish oʻrnining yaratilishiga sabab boʻldi. Yil yakuniga qadar bu koʻrsatkich yana 200 taga ortadi.

40 gektar maydonda bunyod etilgan korxonaning yillik ishlab chiqarish quvvati 2,5 million tonnani, eksport quvvati 10 million dollarni tashkil etadi. Hozirda mahsulotlar ichki bozorga yoʻnaltirilayotgan boʻlsada, tez orada Yevropa davlatlariga eksport qilinishi koʻzda tutilgan.