Марказий банк аҳолининг инвестиция ва жамғариш имкониятларини янада ошириш ҳамда қимматбаҳо металлар муомаласини кенгайтириш мақсадида янги, ўлчовли олтин қуймаларини сотувга чиқаради, дейилади Марказий банк хабарида.

Унга кўра, 17 январдан бошлаб 5, 10, 20, 50 граммли ўлчовли олтин қуймаларга қўшимча равишда оғирлиги 100 грамм бўлган олтиндан тайёрланган ўлчовли қуймалар ҳам тижорат банклари орқали сотувга чиқарилмоқда.

Маълум қилинишича, қуймалар махсус ҳимоя қадоқларида сотув учун тақдим этилади. Олтин қуймаларнинг қадоғи сертификат вазифасини бажариб ўз серия рақамига эга бўлади. Қадоқлари бут олтин қуймалар сотув шохобчаларида қуйма эгасига тўловни амалга ошириш орқали қайтариб сотиб олинади.

Шунингдек, қадоғи бузилган ёки техник талабларга мос келмайдиган олтин қуймаларни қайтариб сотиб олиш уларни техник экспертизадан ўтказиш орқали амалга оширилади ва экспертиза ўтказилгандан сўнг тўлов тўлаб берилади.

Қадоғи бут ҳолатдаги олтин қуймаларни Ўзбекистон ҳудудидан ташқарига олиб чиқишга рухсат берилади, дейилади хабарда.

Маълумот учун, ўлчовли қуймаларнинг 17 январь ҳолатидаги сотув нархларига қарайдиган бўлсак, янги турдаги 100 граммли олтин қуймасининг нархи 116 миллион 603 минг сўмни ташкил қилмоқда.