Jizzax viloyatida alkogol mahsuloti ishlab chiqarayotgan yashirin sexdan 4 tonna spirt ashyoviy dalil sifatida olindi. Bu haqida Iqtisodiy jinoyatlarga qarshi kurashish departamenti xabar berdi.

Unda aytilishicha, Bosh prokuratura huzuridagi Departamentning Jizzax viloyati boshqarmasi va boshqa huquqni muhofaza qiluvchi organ xodimlari hamkorligida oʻtkazilgan tezkor tadbirda fuqaro Sh.T. Sharof Rashidov tumani, “Qahramon” MFY hududidagi savdo doʻkonida turli nomdagi 24 dona qoʻlbola tayyorlangan alkogol mahsulotlarini savdoga qoʻyganligi fosh qilingan.

Tezkor tadbir davom ettirilganda fuqaro Sh.T. ushbu mahsulotlarni “Sharilloq” MFY hududidagi xonadonda yashirin sex tashkil qilib, qoʻlbola alkogol mahsulotlari tayyorlab kelayotgan muqaddam sudlangan fuqaro U.S.dan olganligi aniqlanib, mazkur yashirin sexdan 4 tonna spirt va 480 dona boʻsh shisha idishlar ashyoviy dalil sifatida rasmiylashtirib olingan.

Hozirda mazkur holat yuzasidan Jinoyat kodeksining 186-1-moddasi (etil spirti, alkogolli mahsulot va tamaki mahsulotini qonunga xilof ravishda muomalaga kiritish yoki ishlab chiqarish) bilan jinoyat ishi qoʻzgʻatilib, tergov harakatlari boshlab yuborilgan.