“9S-3306” reysi Jidda – Toshkent yoʻnalishida bortda yuzaga kelgan shoshilinch tibbiy holat sababli Bahrayn aeroportiga majburiy qoʻnishni amalga oshirdi. Bu haqda “Air Samarkand” aviakompaniyasi xabar berdi.

Maʼlum qilinishicha, parvoz vaqtida yoshi katta ayol yoʻlovchining yuragi toʻxtab qolgan. Shundan soʻng, “Air Samarkand” ekipaji — havo kemasi komandiri Degtev Roman Olegovich va ikkinchi uchuvchi Smirnov Yegor Denisovich — tezkor qaror qabul qilib, tibbiy yordam koʻrsatish uchun eng yaqin aeroportga favqulodda qoʻnishni amalga oshirgan. Samolyotga shifokorlar brigadasi chaqirilgan.

Bortkuzatuvchilar ekipaji brigadiri Svetlana Bolkonskaya rahbarligida qoʻnishgacha yoʻlovchiga imkon qadar barcha yordamni koʻrsatgan. Qoʻnish amalga oshirilgandan soʻng, mahalliy shifokorlar reanimatsion tadbirlarni oʻtkazgan. Yoʻlovchining ahvoli barqarorlashgan.

Tibbiyot xodimlari bemor ayolni davolanish uchun mahalliy klinikaga olib borgan. Reys yonilgʻi quyib olgandan soʻng parvozni Toshkentga taxminan 2 soat kechikish bilan davom ettirgan va mahalliy vaqt bilan soat 9:49 da qoʻngan.