Oliy Majlis Senati Raisi Tanzila Narbayeva Jeneva shahrida Parlamentlararo ittifoqning 151-assambleyasi doirasida qator xorijiy davlatlar parlamentlari aʼzolari bilan uchrashuvlar oʻtkazdi.

Jumladan, Koreya Respublikasi Milliy Assambleyasi “Xalq kuchi” partiyasi fraksiyasi rahbari Yun Je Ok bilan uchrashuvda Oʻzbekiston va Janubiy Koreya oʻrtasidagi siyosiy, iqtisodiy va madaniy aloqalarni yanada mustahkamlash masalalari muhokama qilindi.

Shuningdek, joriy yil dekabr oyida Toshkent shahrida oʻtkaziladigan Markaziy Osiyo davlatlari va Koreya Respublikasi parlamentlari rahbarlarining uchinchi uchrashuviga tayyorgarlik masalalari koʻrib chiqildi.

Turkiya Buyuk millat majlisi Tashqi ishlar qoʻmitasi aʼzosi Asuman Erdoʻgʻan bilan ham uchrashuv boʻlib oʻtdi.

Suhbat chogʻida Parlamentlararo Ittifoqning 2026-yil aprel oyida Istanbulda boʻlib oʻtadigan 152-assambleyasi doirasida qoʻshma tadbirlar hamda kelgusi yil sentyabr oyida Samarqand viloyatida oʻtkaziladigan Yosh parlament aʼzolarining 12-Global konferensiyasiga tayyorgarlik masalalari muhokama qilindi.

Sloveniya parlamentining Tashqi siyosat qoʻmitasi raisi Predrag Bakovich bilan boʻlib oʻtgan muloqot davomida Oʻzbekiston va Sloveniya oʻrtasidagi munosabatlarning jadal rivojlanayotgani qayd etildi.

Uchrashuvda doʻstlik guruhlari faoliyatini rivojlantirish, ijtimoiy himoya, gender tenglik va barqaror rivojlanish yoʻnalishlarida hamkorlikni kengaytirish yuzasidan fikrlar almashildi.