Foto: Newsweek

Ukraina oʻzining yangi mahalliy ballistik raketalarini yaqin orada jangga kiritishi mumkin. Gʻarb davlatlari Rossiyaga uzoq masofaga uchadigan qurollar yetkazib berish boʻyicha cheklovlarni yumshatmayotgan bir paytda Kiyev oʻz kuchlarini mustahkamlashga urinmoqda. Bu haqda “Newsweek” xabar berdi.

Maʼlum qilinishicha, Ukraina parlamentidagi NATO delegatsiyasi rahbari Yegor Chernev oktyabr oxirida “Hrim-2” raketasi haqida gapirdi. Avvalroq Prezident Vladimir Zelenskiy yangi ballistik raketaning sinovlari muvaffaqiyatli oʻtganini maʼlum qilgan edi.

“Hrim-2” raketasi taxminan 483 kilometr masofagacha ucha oladi. Bu masofa Moskva shahrini nishonga olish uchun yetarli boʻlmasa-da, boshqa muhim harbiy inshootlarga tahdid solishi mumkin. Ukraina hududidan uchirilsa, ushbu raketa Rossiyaning harbiy bazalari yoki oʻq-dorilar omborlarini nishonga olishi uchun yetarli.

Xabar qilinishicha, Ukraina oʻzining harbiy qurollari arsenalini Gʻarb yordamiga tayanib toʻldiradi, lekin mahalliy ishlab chiqarish texnologiyalariga ham katta eʼtibor qaratmoqda. Masalan, Neptun raketasi bilan Moskva kemasini choʻktirishga muvaffaq boʻlgan. Yaqinda Palianytsia nomli raketa-dron ham janglarda qoʻllanilganini Zelenskiy taʼkidlagandi.

Sovet davridan qolgan Tochka raketalarining zaxiralari esa kamayib bormoqda. Ukraina ishlab chiqargan raketalar Gʻarb davlatlari tomonidan qoʻyilgan cheklovlarga boʻysunmaydi. Moskva esa Ukraina hududidan Rossiyaga qilingan uzoq masofali zarbalar uchun qasos olishini vaʼda qilgan.

“Hrim-2” raketalari boshqa turdagi qurollardan farqli oʻlaroq, Rossiya havo mudofaa tizimlari tomonidan osongina urib tushirib boʻlmaydi. Ushbu raketalar yer usti ishga tushirish moslamalari yordamida kechasi yashirin joylarga olib borilishi va tez harakat qilish imkoniyatiga ega.

Avvalroq, Oʻzbekiston Rossiya yoki Xitoyning qaysi biri bilan kattaroq savdo aylanmasiga egaligi haqida xabar berilgandi.