Samarqand va Xorazm viloyatlarida elektr energiyasidan noqonuniy foydalanganlik holatlari aniqlandi. Bu haqda Bosh prokuratura huzuridagi Iqtisodiy jinoyatlarga qarshi kurashish departamenti xabar berdi.

Qayd etilishicha, Departamentning Jomboy tumani boʻlimi tomonidan oʻtkazilgan tergovga qadar tekshiruvda “X.B.” fermer xoʻjaligi rahbari I.X. tijorat maqsadida suv nasosini elektr tarmogʻiga oʻzboshimchalik bilan toʻgʻridan-toʻgʻri ulab, 243,7 mln soʻmlik elektr energiyasidan noqonuniy foydalanganligi aniqlangan.

Shu kabi, Departamentning Shovot tumani boʻlimi tomonidan oʻtkazilgan tergovga qadar tekshiruvda “B.O.” fermer xoʻjaligi rahbari N.B. tijorat maqsadida suv nasosini umumiy foydalanishdagi elektr tarmogʻiga oʻzboshimchalik bilan toʻgʻridan-toʻgʻri ulab, 205,6 mln soʻmlik elektr energiyasidan noqonuniy foydalanganligi aniqlangan.

Shuningdek, Departamentining Urganch shahri boʻlimi tomonidan oʻtkazilgan tergovga qadar tekshiruvda “G.S.” MCHJ rahbari S.X. savdo doʻkonida elektr tarmogʻiga oʻzboshimchalik bilan ulanib 102 mln soʻmlik elektr energiyasidan noqonuniy foydalanganligi aniqlangan.

Hozirda mazkur holatlar yuzasidan Jinoyat kodeksining 169-moddasi (oʻgʻrilik) bilan jinoyat ishlari qoʻzgʻatilib, tergov harakatlari oʻtkazilmoqda.