Foto: Jonathan Ernst / Reuters

AQSH prezidenti Donald Tramp agar Eron yadroviy salohiyatini tiklashga urinadigan boʻlsa, Vashington Islom Respublikasiga qarshi yana zarba berishini istisno etmadi. Bu haqda TASS xabar berdi.

“Biz Yaqin Sharqda urushlarni toʻxtatdik, Eronning yadroviy qurolga ega boʻlishining oldini oldik. Ular hammasini qayta boshlashlarini aytishlari mumkin, lekin bu ular uchun juda xavfli qadam boʻladi. Chunki biz qaytib kelamiz. Ular boshlashi bilanoq biz qaytamiz. Va menimcha, ular buni yaxshi tushunib turibdi”, — dedi Tramp Oq uydagi matbuot anjumanida.

Yaqindagi harbiy qarama-qarshiliklar

Eslatib oʻtamiz, 13-iyunga oʻtar kechasi Isroil Eronning yadroviy va raketalar dasturlariga qarshi harbiy operatsiya boshlagan edi. Oradan koʻp oʻtmay, Eron javob zarbasini berdi.

Toʻqqiz kun oʻtib, AQSH Eronning Isfahon, Natanz va Fordo shaharlaridagi yadroviy obyektlariga havodan zarba berdi. Bu hujumlarga javoban Eron Qatarda joylashgan AQSHning Yaqin Sharqdagi eng yirik harbiy bazasi — “Al-Udeyd”ga hujum uyushtirdi.

Keyinchalik Isroil va Eron oʻzaro kelishuvga erishib, oʻt ochishni toʻxtatish toʻgʻrisidagi kelishuvni imzolashdi. Ushbu kelishuv 24-iyundan kuchga kirdi.