Videodan kadr

Toshkent viloyati Parkent tumanida piyodalar oʻtish joyidan yugurib oʻtayotgan 9 yoshli bolani “Cobalt” urib ketdi. Holat yuzasidan viloyat Yoʻl harakati xavfsizligi boshqarmasi maʼlumot berdi.

Bildirilishicha, YTH joriy yilning 18-oktyabr kuni soat taxminan 11:00larda Toshkent viloyati Parkent tumani hududidan oʻtgan D-015 “Qiziltogʻ sh. – Parkent sh. – Yangi bozor q.” avtomobil yoʻlining 57-kilometrida yoʻl-transport hodisasi sodir boʻlgan.

Hodisada 39 yoshli X.D “Cobalt” rusumli avtomashinani boshqarib ketayotib, piyodalar oʻtish joyidan yugurib oʻtayotgan 9 yoshli Sh.M.ni urib yuborgan. Oqibatda piyoda tan jarohatlari olib, tuman markaziy shifoxonasiga yotqizilgan. Taʼkidlanishicha, hozirda uning ahvoli yaxshi, davolanmoqda.

“Ayrim ijtimoiy tarmoqlarda bola halok boʻlgani haqida tarqatilayotgan maʼlumotlar mutlaqo asossiz, haqiqatga toʻgʻri kelmaydi (feyk)”, deyiladi YHXB xabarida.

Shuningdek, ushbu YTHda ishtirokchi sifatida “Damas” rusumli avtomashina haydovchisi, 33 yoshli K.X. ham qayd etilgan. Hozirda holat yuzasidan Parkent tumani IIB masʼul xodimlari tomonidan tergovga qadar tekshiruv harakatlari olib borilmoqda.