AQSH prezidenti Donald Tramp Eron bilan hamkorlik qilayotgan davlatlarga nisbatan 25 foizlik boj toʻlovlari joriy etilishini maʼlum qildi. Bu haqda u Truth Social ijtimoiy tarmogʻidagi sahifasida yozdi.

Amerika rahbari mazkur qaror zudlik bilan kuchga kirishini hamda Tehron bilan har qanday shaklda ish olib borayotgan barcha davlatlarga taalluqli ekanini qayd etdi.

Bloomberg yozishicha, Eronning asosiy savdo hamkorlari qatoriga Hindiston, Turkiya va Xitoy kiradi. Tramp avvalroq Rossiya neftini sotib olgani uchun Hindiston tovarlariga 50 foizgacha boʻlgan boj toʻlovlarini joriy etgan edi. Xitoy mahsulotlariga qoʻshimcha 25 foizlik tariflar joriy qilinishi esa AQSH prezidenti Donald Tramp oʻtgan yil oxirida Xitoy Xalq Respublikasi raisi Si Szinpin bilan tuzgan savdo sulhini izdan chiqarishi mumkin.

Oq uy matbuot kotibi Karolayn Livittning aytishicha, Tramp Erondagi norozilik namoyishlarining keskin bostirilishi sababli ushbu mamlakatga qarshi har qanday choralarni, jumladan aviahujumlarni ham koʻrib chiqmoqda. Biroq prezident uchun ustuvor yoʻl hozircha diplomatiya hisoblanadi.