Oliy Majlis Senati Raisi Tanzila Norboyeva Samarqand shahrida oʻtkazilayotgan Osiyo xotin-qizlari forumida ishtirok etish uchun yurtimizga tashrif buyurgan “BMT Ayollar” tuzilmasining Yevropa va Markaziy Osiyo mamlakatlari boʻyicha mintaqaviy direktori Belen Sans Luke bilan muzokara oʻtkazdi.

Uchrashuvda Oʻzbekistonning BMT va uning ixtisoslashgan tuzilmalari bilan hamkorligi munosabatlar tarixida eng yuqori darajaga koʻtarilgani alohida qayd etildi. Ayniqsa, keyingi yillarda gender tenglik, xotin-qizlarning huquqlarini taʼminlash, imkoniyatlarini kengaytirish yoʻnalishida “BMT Ayollar” tuzilmasi bilan hamkorlik yangi bosqichga chiqqani aytib oʻtildi.

Muloqot chogʻida Xotin-qizlarning jamiyatdagi rolini oshirish, gender tenglik va oila masalalari boʻyicha respublika komissiyasi bilan Tuzilma oʻrtasida qoʻshma loyihalarni amalga oshirish orqali hamkorlik aloqalarini yanada mustahkamlash masalalari koʻrib chiqildi.

Xususan, gender byudjetlashtirish, gender statistikasi hamda gender audit yoʻnalishlarida oʻzaro tajriba almashish, ilgʻor amaliyotlarni joriy qilish boʻyicha fikr almashildi.

Munosabatlarni yanada rivojlantirish maqsadida hamkorlik boʻyicha tegishli hujjat loyihasini ishlab chiqish, unda aniq yoʻnalishlarni belgilashga kelishib olindi.