Birlashgan Millatlar Tashkilotining Falastin xalqiga yordam dasturi boʻyicha maxsus vakili Yako Silliersning maʼlum qilishicha, Gʻazo sektorini qayta tiklash ishlari uchun qariyb 70 milliard dollar zarur boʻladi. Bu haqda TASS axborot agentligi xabar berdi.

“BMT, Yevropa Ittifoqi va Jahon banki tomonidan birgalikda oʻtkazilgan tezkor baholash natijalariga koʻra, Gʻazoni tiklash uchun taxminan 70 milliard dollar kerak boʻladi”, — dedi Silliers.

U Gʻazo sektorini qayta tiklash muddatlarini hozircha aniqlashning imkoni yoʻqligini bildirdi.

Silliersning soʻzlariga koʻra, BMT va hamkor tashkilotlarning vazifasi nafaqat vayronalarning miqyosini oʻlchash, balki qaysi hududlarni birinchi navbatda tiklash kerakligini aniqlash va asosiy eʼtiborni qayerga qaratishni belgilashdan iborat.

“Ehtimol, Gʻazoning barcha hududlarini toʻliq tiklashning iloji boʻlmas”, — deya taʼkidladi u.

Mutaxassislarning fikricha, soʻnggi harbiy toʻqnashuvlar natijasida Gʻazo sektorining infratuzilmasi, uy-joylari, sogʻliqni saqlash va taʼlim tizimlari jiddiy zarar koʻrgan. Shu bois, tiklash ishlari uzoq muddat va katta mablagʻ talab etadi.