2025-yil 6-oktyabrdan 7-oktyabrga oʻtar kechasi Yer aholisi navbatdagi tabiiy astronomik hodisaga — super oyni kuzatish imkoniga ega boʻldi. Bu holat oyning Yerga nisbatan eng yaqin masofaga kelishi va toʻlin oy fazasiga toʻgʻri kelishi natijasida yuzaga chiqadi.

Astronomik kuzatuvlarga koʻra, bu galgi super oy davomida Oy Yerdan taxminan 357 000 kilometr uzoqlikda joylashgan. Odatdagi toʻlin oyga nisbatan uning koʻrinishi yana ham yorqinroq va 14 foiz gacha kattaroq boʻladi. Hodisa mahalliy vaqt bilan kechki soat 20:00 lardan boshlab koʻrinib, toʻliq fazada soat 03:00 atrofida namoyon boʻldi.

Oʻzbekiston Fanlar akademiyasi Astronomiya instituti mutaxassislarining taʼkidlashicha, super oy inson salomatligiga xavf tugʻdirmaydi va asosan estetik jihatdan qiziqarli hodisa sanaladi. Biroq baʼzi insonlar uyqu muammolari yoki emotsional oʻzgarishlarni his etishi mumkin.

Super oyni shahar yorugʻliklaridan uzoqroq, ochiq va toza havoda kuzatish tavsiya etildi. Bu galgi hodisa Shimoliy va Janubiy Amerika, Yevropa, Afrika hamda Osiyoning katta qismidan juda yaxshi koʻrinishi qayd etildi. Oʻzbekiston osmonida ham ob-havo sharoiti yaxshi boʻlgan hududlarda super oy toʻliq namoyon boʻldi.

Astronomlarning fikricha, 2025-yildagi ushbu super oy yil davomida kuzatiladigan oxirgi shunday hodisalardan biri hisoblanadi. Kelgusi super oy 2026-yil bahorida sodir boʻlishi kutilmoqda. Astronomiya havaskorlari va fotograflar uchun bunday tabiiy hodisalar noyob imkoniyat hisoblanadi.