“Shoʻrtangazkimyo majmuasi” MCHJda “Korrupsiya — jamiyat va taraqqiyot kushandasi” mavzusida maʼrifiy-amaliy tadbir boʻlib oʻtdi.

“Oʻzbekneftgaz” AJ tomonidan tashkil etilgan tadbirda jamiyat hamda uning tasarrufidagi korxonalarda korrupsiyaga qarshi kurashish yoʻnalishida olib borilayotgan ishlar, amalga oshirilayotgan chora-tadbirlar va ularning natijalari atroflicha tahlil qilindi.

— Bugungi kunda “Oʻzbekneftgaz” AJ, Bosh prokuratura va Korrupsiyaga qarshi kurashish agentligi oʻrtasida tasdiqlangan “Yoʻl xaritasi” asosida tizimli ishlar olib borilmoqda, — dedi “Oʻzbekneftgaz” AJ Korrupsiyaga qarshi ichki nazorat departamenti boshligʻi Alisher Davlanov. — Departament tomonidan jamiyat tasarrufidagi korxonalar rahbariyati bilan hamkorlikda aniqlangan kamchiliklarni bartaraf etish, salbiy holatlarning oldini olish hamda masʼul shaxslarga nisbatan tegishli choralar koʻrish ishlari izchil davom etmoqda. Jumladan, hisobot davrida oʻtkazilgan oʻrganishlar natijasida aniqlangan kamchiliklar boʻyicha 62 nafar masʼul xodimga nisbatan intizomiy jazo choralari qoʻllanildi.

Shuningdek, tadbir yakunida “Oʻzbekneftgaz” AJ Korrupsiyaga qarshi ichki nazorat departamenti tomonidan tizim tashkilotlarida samarali faoliyat olib borayotgan bir guruh xodimlar tashakkurnomalar bilan taqdirlandi.

Jahongir BOYMURODOV, “Xalq soʻzi”.