Foto: Prezident matbuot xizmati

Bugun, 25-oktyabr kuni Oʻzbekistonda Ichki ishlar organlari xodimlari kuni nishonlanmoqda. Shu munosabat bilan Respublikaning turli hududlarida tantanali tadbirlar tashkil etilmoqda.

Xususan, poytaxt Toshkent shahrida oʻtgan ana shunday tadbirlardan birida Prezident matbuot kotibi Sherzod Asadov davlatimiz rahbari Shavkat Mirziyoyevning tizim xodimlari va faxriylariga bayram tabrigini oʻqib eshittirdi.

Sherzod Asadovning bildirishicha, qutlovda ichki ishlar tizimini xalqchil va samarali tuzilmaga aylantirish boʻyicha soʻnggi yillarda amalga oshirilgan keng koʻlamli islohotlar natijasida mamlakatimizda tinchlik va osoyishtalik muhitini mustahkamlash, fuqarolar xavfsizligini taʼminlash boʻyicha mustahkam zamin yaratilgani taʼkidlangan.

Jinoyatchilikning oldini olish, mahallalarda xavfsiz muhit yaratish, raqamli texnologiyalar va sunʼiy intellekt imkoniyatlaridan foydalangan holda jamoat xavfsizligini taʼminlash, kiberjinoyatchilik va giyohvandlikka qarshi kurashish sohasida erishilayotgan yutuqlar bilan birga, soha oldida turgan ustuvor vazifalar qayd etilgan.

Prezident tabrigida Oʻzbekiston xalqining hayotini yanada osoyishta va fayzli qilishga qaratilgan harakatlar bundan buyon ham ustuvor darajada izchillik bilan davom ettirilishi, ichki ishlar xodimlarining mehnatini munosib qadrlash, zamonaviy ish sharoitlari bilan taʼminlash, malakali kadrlar tayyorlash masalalari doimo eʼtibor markazida boʻlishi taʼkidlangan.

Shuningdek, davlat rahbari ichki ishlar organlari xodimlariga tinchlik va xavfsizlik yoʻlidagi sharafli va masʼuliyatli xizmatida katta muvaffaqiyatlar tilagan.