Joriy yilning 11-dekabr kuni Oliy Majlis Senati Raisining birinchi oʻrinbosari Sodiq Safoyev Braziliya Federativ Respublikasi Tashqi ishlar vaziri oʻrinbosari Syuzan Kleyebank bilan uchrashdi.

Suhbat chogʻida Oʻzbekiston–Braziliya munosabatlari va parlamentlararo hamkorlikning istiqbollari muhokama qilindi.

Uchrashuvda mamlakatimizda olib borilayotgan keng koʻlamli islohotlar, iqtisodiy rivojlanish, investitsiya muhiti va kadrlar salohiyati yuqori baholandi.

Siyosiy maslahatlashuvlar, savdo-iqtisodiy hamkorlik, investitsiyalar va atrof-muhitni muhofaza qilish sohasidagi hamohanglik masalalariga alohida eʼtibor qaratildi.

Oliy Majlisda tashkil etilgan Braziliya bilan parlamentlararo doʻstlik guruhi faoliyati va Braziliya parlamentida Oʻzbekiston bilan doʻstlik guruhini tashkil etish uchun hamkorlik qilish yuzasidan fikr almashildi.

Uchrashuv yakunida parlamentlararo hamkorlikni yanada faollashtirish, parlament aʼzolari oʻrtasida onlayn uchrashuvlar tashkil etish hamda Braziliya Milliy kongressi delegatsiyasining Oʻzbekistonga tashrifini uyushtirishga kelishib olindi.