Fuqarolardan yoʻl yoqasidagi chodirlardan tarvuz va qovun sotib olmaslik soʻraldi. Bu haqda Sanitariya-epidemiologik osoyishtalik va jamoat salomatligi qoʻmitasi axborot xizmati xabar berdi.

Qoʻmitaga koʻra, bunday poliz mahsulotlari va mevalar avtotransport vositalarining chiqindilaridan toksik moddalarni oʻziga oʻzlashtiradi va sogʻliq uchun zararli hisoblanadi. Xususan, qovun mahsuloti notoʻgʻri isteʼmol qilinsa, inson salomatligiga jiddiy zarar yetkazishi mumkin.

“Diyetologlar qovunni asosiy ovqatlar orasida, boshqa ovqatlar bilan aralashmasdan isteʼmol qilishni maslahat beradi. Uni och qoringa, shuningdek kechqurun soat 17:00-19:00 dan keyin isteʼmol qilish tavsiya etilmaydi”, deyiladi xabarda.

Qoʻshimcha qilinishicha, uglevod mahsulotlarini kechqurun isteʼmol qilish insulinning koʻpayishi va yogʻlarning toʻplanishiga olib keladi. Qoʻllash mumkin boʻlmagan holatlar mavjud: oshqozon yarasi yoki gastritning kuchaygan davrida qovunni isteʼmol qilmaslik kerak.

Qovun yuqori kaloriyali mahsulot hisoblanmaydi (naviga qarab 100 g. uchun atigi 30-38 kkal). Kaloriya miqdori past boʻlishiga qaramay, qovun yuqori glikemik indeksga ega va shakar miqdori koʻpaygan (banan kabi 60-65), shuning uchun u diabet va semizlikka moyillar uchun maʼqul emas.

Qayd etilishicha, qovun asab tizimiga foydali va kayfiyatni yaxshilaydi. Homilador ayollar uchun V9 vitamini yoki foliy kislotasi tufayli homilaning asab tizimi toʻgʻri rivojlanishi uchun qovun isteʼmoli tavsiya etiladi. Qovun ich qotishi, koʻrishni yaxshilash, yurak faoliyatini yaxshilash, osteoporoz, raxit yoki psoriaz, teri, soch va tirnoqlarning holatini yaxshilashga yordam beradi.