Xitoylik investorlar Rishton tumanida parfyumeriya sanoatini rivojlantirishga katta qiziqish bildirmoqda.

Shu maqsadda Rishton tumani hokimligida xitoylik investorlar bilan parfyumeriya mahsulotlari ishlab chiqarish, mazkur sohada xizmat koʻrsatish tarmoqlarini yoʻlga qoʻyish hamda zamonaviy parfyumeriya zavodi barpo etish masalalari yuzasidan muzokaralar oʻtkazildi.

Tashrif doirasida xitoylik tadbirkorlar delegatsiyasi tumandagi bir qator hududlarda boʻlib, amalga oshirilishi mumkin boʻlgan investitsiya loyihalari uchun mos joylar bilan tanishdi. Shuningdek, mehmonlarga tumanda faoliyat koʻrsatayotgan mahalliy sanoat zonalari hamda ushbu hududlarda xorijiy investorlar uchun yaratilgan shart-sharoitlar haqida batafsil maʼlumot berildi.

Delegatsiya aʼzolari sanoat zonalari faoliyatini oʻrganish, shuningdek, yaqinda ish boshlagan Xitoy korxonasi tajribasi bilan tanishish imkoniyatiga ega boʻldi. Ushbu jarayonda yurtimizda faoliyat olib borayotgan xitoylik tadbirkorlar bilan oʻzaro tajriba almashish ham amalga oshirildi.

— Yuzma-yuz muloqotlar davomida parfyumeriya sanoatini jahon andozalari darajasida rivojlantirish, eksportbop mahsulotlar ishlab chiqarish hamda mazkur yoʻnalishda malakali mutaxassislar tayyorlash boʻyicha kelishuvlarga erishildi, — dedi Rishton tumani hokimi oʻrinbosari Baxtiyor Roʻzaliyev. — Uchrashuv yakunida istiqbolli loyihalarni amalga oshirish yuzasidan aniq vazifalar belgilandi.

Botir MADIYOROV, “Xalq soʻzi”.