Ispaniya futbolida navbatdagi janjal yuzaga keldi. “Sevilya” klubi prezidenti Xose Mariya del Nido “Real Madrid” klubining Ispaniya Qirollik futbol federatsiyasi (RFEF) va Sport masalalari boʻyicha Oliy kengashga (KSD) hakamlarning ish faoliyatidan norozilik bildirgan shikoyatiga keskin munosabat bildirdi.

Madrid klubi ushbu shikoyatni “Espanyol”ga qarshi oʻyinda 0:1 hisobida magʻlub boʻlgandan soʻng rasmiy ravishda yoʻllagan edi. Klub rahbariyati hakamlarning notoʻgʻri qaror qabul qilayotgani va bu “Real”ning natijalariga salbiy taʼsir koʻrsatayotganini taʼkidlagan edi.

Shunga qaramay, “Sevilya” prezidenti bu holatni mutlaqo qabul qilib boʻlmaydigan va sport etikasi tamoyillariga zid deb baholadi. U oʻz bayonotida “Real Madrid”ning bu harakatini nafaqat hakamlarning shaʼniga, balki butun musobaqaning halolligiga shubha tugʻdiruvchi dushmanona xatti-harakat deb atadi.

“Bu butun futbol tizimiga qaratilgan hujum. Biz bunday harakatlarga qarshi turishimiz kerak. Klub oʻzining rasmiy telekanali – «Real TV” va boshqa ommaviy axborot vositalari orqali Ispaniya futboliga putur yetkazishga harakat qilmoqda. Bunday ishga biz aslo koʻz yuma olmaymiz», – dedi Xose Mariya del Nido.

Shuningdek, “Sevilya” prezidenti hakamlarni toʻliq qoʻllab-quvvatlashini ham alohida taʼkidladi: “Ularning shaʼniga shubha qilish mutlaqo notoʻgʻri. Hakamlar oʻz vazifalarini mustaqil bajarishlari kerak. «Real Madrid” ularga bosim oʻtkazishga urinmoqda va bu ularning erkin qaror qabul qilishiga xalaqit berishi mumkin».

Hozirda La Liga turnir jadvalida “Real Madrid” birinchi oʻrinda bormoqda. “Atletiko Madrid” musobaqaning ikkinchi pogʻonasida joylashgan boʻlsa, “Barselona” uchinchi oʻrinni egallab turibdi.

Bu mojaro Ispaniya futbolida katta shov-shuvga sabab boʻlishi kutilmoqda. Hakamlarning faoliyatiga oid eʼtirozlar avval ham koʻplab klublar tomonidan bildirilgan, ammo “Real Madrid”ning rasmiy shikoyati boshqa jamoalar orasida kuchli norozilikka sabab boʻlmoqda. Ushbu vaziyat La Liga rahbariyati va sport tashkilotlari tomonidan qanday baholanishi esa hali nomaʼlumligicha qolmoqda.