Nukus, Urganch va Fargʻona aeroportlarini erta tongdan quyuq tuman qoplagan va noqulay ob-havo sharoiti tufayli havo kemalarini qabul qilish va uchirilishiga vaqtinchalik cheklovlar joriy etilgan.

Xususan, Uzbekistan Airways aviakompaniyasining Sankt-Peterburg – Urganch yoʻnalishi boʻyicha HY-9638 reysi samolyoti soat 06:04 da Buxorodagi muqobil aerodromga qoʻndi.

Toshkent – Urganch/Urganch – Toshkent yoʻnalishi boʻyicha HY-51/52 reyslari ham kechiktirildi.

Dastlabki maʼlumotlarga koʻra, samolyot Toshkentdan Urganchga soat 12:00 ga, qaytish reysi esa soat 14:15 ga koʻchirilgan.

Shuningdek, Toshkent — Nukus yoʻnalishi boʻyicha HY-11 reysi ham Nukusdagi tuman sabab mahalliy vaqt bilan soat 11:30 ga qoldirildi.

Bundan tashqari, noqulay ob-havo sharoiti tufayli Fargʻona aeroportida samolyotlarni qabul qilishga cheklovlar joriy etilgan edi. Jumladan, Silk Avia aviakompaniyasining Toshkent — Fargʻona yoʻnalishidagi US-401 reysi mahalliy vaqt bilan soat 11:20 ga koʻchirilgan.

Biroq, ayni paytda Fargʻona xalqaro aeroportida samolyotlarni qabul qilishga joriy etilgan cheklovlar olingan. Aeroport odatiy rejimda ishlamoqda.