Foto: Yunus Boʻriyev / “Xalq soʻzi”

Yalpi majlisda “Oʻzbekiston Respublikasining ayrim qonun hujjatlariga qoʻshimcha va oʻzgartirishlar kiritish toʻgʻrisida”gi Qonun koʻrib chiqildi.

Mamlakatimizda atrof-muhitni muhofaza qilish, ekologik xavfsizlikni taʼminlash, tabiiy resurslardan oqilona foydalanish va ekologik vaziyatni yaxshilash boʻyicha tizimli ishlar olib borilmoqda.

Shuningdek, respublikamizda milliy va xorijiy foydalanuvchilar uchun rasmiy statistika maʼlumotlarining ochiqligi va shaffofligini eng yuqori darajada taʼminlash, shu jumladan, iqtisodiyot sohalarining rivojlanish koʻrsatkichlari toʻgʻrisidagi maʼlumotlardan foydalanish imkoniyatlarini kengaytirish boʻyicha tizimli ishlar amalga oshirilmoqda.

Qonun bilan “Tabiatni muhofaza qilish toʻgʻrisida”gi va “Chiqindilar toʻgʻrisida”gi qonunlarga qurilish oynasidan foydalanish natijasida yuzaga keladigan chiqindilarni qayta ishlash xarajatlarini qoplash uchun utilizatsiya yigʻimini joriy etishni belgilovchi hamda ayrim qonunlarga Oʻzbekiston Respublikasi Milliy statistika qoʻmitasining nomi va huquqiy maqomi oʻzgartirilishini nazarda tutuvchi qoʻshimcha va oʻzgartirishlar kiritilmoqda.

Senatorlar tomonidan taʼkidlanganidek, Qonunning qabul qilinishi qurilish oynasi sanoatini rivojlantirishga, ekologik xavfsizlikni taʼminlash, fuqarolar sogʻligʻini va atrof-muhitni oʻz isteʼmol xususiyatlarini yoʻqotgan qurilish oynasidan hosil boʻladigan chiqindilarning zararli taʼsiridan himoya qilish va qayta ishlash bilan bogʻliq faoliyatni rivojlantirishga xizmat qiladi.

Shuningdek, mamlakatning rasmiy statistika sohasidagi maʼmuriy islohotlarni samarali amalga oshirish doirasida statistika organlarining faoliyatini takomillashtirishga hamda foydalanuvchilar uchun yanada qulay shart-sharoitlar yaratadi.

Muhokama yakunida Qonun senatorlar tomonidan maʼqullandi.